Qarjy mınıstrligi alaqanmen tólem jasaý júıesin engize me

ASTANA. KAZINFORM – Qarjy vıtse-mınıstri Áset Turysov Qazaqstanda adamnyń alaqany arqyly tólem jasaý júıesin engizý qanshalyqty qaýipsiz ekenin aıtty.

Búgin Ortalyq kommýnıkatsııalar qyzmetindegi baspasóz máslıhatynda eldegi bankterdiń biriniń alaqanmen tólem jasaý júıesin engizýine qatysty suraq qoıyldy.

- Bul júıe qanshalyqty qaýipsiz? Memlekettik organdar da tólemniń osy júıesin engizýdi josparlap otyr ma? - dep surady tilshiler. 

Vıtse-mınıstr qazir eldegi bankterdi tsıfrlandyrý deńgeıi óte jońǵary ekenin aıtty. 

- Bul baǵyttaǵy jańa tetikterdi QR Ulttyq banki únemi qadaǵalap otyratyny belgili. Kez kelgen osyndaı tehnıkalyq jańa tetikter aqparattyq qaýipsizdik talaptary qamtylǵan tıisti zańǵa sáıkes qatań túrde júzege asyrylady. Meniń oıymsha, bul jańa tetik synaqtan ótip, tyńǵylyqty tekseriledi. Sondyqtan zańnama aıasynda bul jańa tetikter zańǵa sáıkes bolýyn qamtamasyz etý úshin barlyq rásimderden ótýi qajet, - dedi Á. Turysov. 

Sonymen qatar ol memlekettik organdarda osy tehnologııany engizý jospary qarastyrylmaǵynyn aıtty. 

- Qarjy mınıstrligi muny áli qarastyrmady. Biraq aldaǵy ýaqytta onyń tıimdiligin jáne onyń barlyq talaptarǵa saı keletinin kórsek, jańa júıeni qoldaný múmkindigi pysyqtalýy yqtımal. Ázirge, bul sheshim Qarjy mınıstrliginde qarastyrylǵan joq, - dedi vıtse-mınıstr. 

Budan buryn habarlanǵandaı, Astana qalasyndaǵy №113 jalpy orta «Keleshek» mektebinde ınnovatsııalyq bıometrııalyq júıe iske qosyldy. Bul — oqýshylardyń qaýipsizdigin qamtamasyz etý jáne oqý protsesin tıimdi uıymdastyrý maqsatynda engizilgen jańa tehnologııanyń bir túri. «Alaqan» júıesi mektepke kirý, shyǵý jáne ashanaǵa kirýdi baqylaýdyń jańa tásili retinde quryldy. Bul júıe oqýshylardyń alaqandaryn skanerleý arqyly jumys isteıdi. Ár oqýshynyń alaqan sıpaty arnaıy tsıfrlyq júıege tirkeledi, jáne olar mektepke kirip-shyǵý kezinde nemese ashanaǵa kirgende, tek alaqandary arqyly ǵana tirkelip ótedi.