Qarjy mınıstrligi: 25 iri kompanııa salyqtyq rýllıng júıesine qosyldy

ASTANA. KAZINFORM – Qazaqstanda 25 iri kompanııa salyqtyq rýllıng qaǵıdaty boıynsha jumys istep jatyr. Bul týraly Májiliste ótken «Salyqtyq rýllıng – salyq zańnamasyn túsinikti qoldanýdyń tıimdi júıesi» atty dóńgelek ústel barysynda QR Qarjy vıtse-mınıstri Erjan Birjanov málim etti.

Vıtse-mınıstrdiń aıtýynsha, salyqtyq rýllıng júıesi kompanııalardyń qyzmetin aldyn ala taldap, olardyń bolashaq salyq mindettemelerine qatysty túsinikteme berýge múmkindik beredi.

– Mysaly, men belgili bir kelisimshart jasaspaqpyn, taýar jetkizý belgili bir aıda júzege asady. Osyndaı jaǵdaıda men salyqty qalaı tóleımin, esepti qalaı júrgizemin degen suraqtar týyndaýy múmkin. Mine, salyqtyq rýllıng engizilgen jaǵdaıda memlekettik organnyń mamandary boljamdy salyq mindettemeleri boıynsha naqty jaýap bere alady, – dedi Erjan Birjanov.

Jańa júıe jańartylǵan Salyq kodeksi aıasynda iske asyrylyp otyr. Qazirgi tańda kóldeneń monıtorıng jobasyna 25 iri kompanııa qatysyp jatyr.

Sonymen qatar mınıstrlik salyq salasynda jıi qoıylatyn suraqtarǵa arnalǵan derekter bazasyn qalyptastyryp jatyr.

– Jańa Salyq kodeksi engizilgennen keıin kóptegen suraqtar týyndap jatyr. Mysaly, ótken jyly salyqtyq normalar boıynsha túsinikteme alý úshin shamamen 400 myń salyq tóleýshi júgingen. Sol sebepti biz eń ózekti suraqtar men jaýaptardy qamtıtyn derekter bazasyn ázirlep jatyrmyz. Ol bizdiń portalǵa ornalastyrylady. Bazada jasandy ıntellekt elementteri bar izdeý júıesi jumys isteıdi. ıAǵnı qoldanýshyǵa naqty bapty engizýdiń qajeti joq, qarapaıym suraq qoısa, júıe tıisti jaýapty avtomatty túrde usynady, – dep tolyqtyrdy vıtse-mınıstr.

Eske sala keteıik, Memleket basshysy jańa Salyq kodeksine jáne «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» Zańǵa qol qoıdy.