Qarjy mınıstrligi 2,5 mlrd dollardyń eýrooblıgatsııalaryn shyǵardy

ASTANA. KAZINFORM - Qazaqstan Respýblıkasynyń Qarjy mınıstrligi 2,5 mlrd. AQSh dollarynyń egemendi eýrooblıgatsııalardy sátti shyǵardy, dep habarlaıdy mınıtsrliktiń baspasóz qyzmeti.

Bıylǵy 24 maýsymda Qazaqstan Respýblıkasy halyqaralyq kapıtal naryǵyna 2,5 mlrd. AQSh dollaryndaǵy egemendi eýrooblıgatsııalardy ornalastyrdy, onyń ishinde:

- 7 jyl merzimge 1,35 mlrd AQSh dollary somasyndaǵy transh, kýpondyq mólsherlemesi – 5%;

- 12 jyl merzimge 1,15 mlrd AQSh dollary somasyndaǵy transh, kýpondyq mólsherlemesi – 5,5%.

Usynystyń aldynda Qazaqstan Respýblıkasy Qarjy mınıstrligi Londonda roýdshoý ótkizip, oǵan shamamen 180 iri ınvestor qatysty. Eýrooblıgatsııalarǵa degen suranys usynystan eki ese asyp tústi.

Munaı baǵasynyń kúrt tómendeýi, geosaıası turaqsyzdyq jáne bazalyq mólsherlemelerdiń qubylmalylyǵy sııaqty kúrdeli naryqtyq jaǵdaılarǵa qaramastan, Qarjy mınıstrligi óte básekege qabiletti tabystylyqpen ornalastyrýǵa qol jetkizdi.

Alynǵan kiristilik deńgeıi nesıelik reıtıngi joǵary (A/AA) Polsha, Saýd Arabııasy jáne Chılı sııaqty elderdiń kórsetkishterimen salystyrýǵa keledi jáne BBB reıtıngindegi Meksıka, Vengrııa men Perý sııaqty elderden aıtarlyqtaı tómen boldy.

Atap aıtqanda, Qazaqstan bıylǵy jyly A/BBB reıtıngindegi elder arasynda eń tómengi mólsherlemelerdiń birimen oblıgatsııalardy ornalastyrý boıynsha rekord ornatty.

Mundaı tıimdi tabystylyq deńgeılerine eldiń myqty makroekonomıkalyq kórsetkishteri – turaqty ekonomıkalyq ósim, tómen memlekettik qaryz jáne joǵary syrtqy rezervter arqasynda qol jetkizildi.

Memleket basshysynyń bastamasymen júrgizilip jatqan salyq-bıýdjet salasyndaǵy reformalar men saıası ózgerister halyqaralyq ınvestorlardyń Qazaqstanǵa degen senimin edáýir arttyrdy.

Bul ornalastyrý bolashaqta ulttyq kompanııalar men jeke sektor emıtentterdiń shyǵarylymy úshin benchmark belgileýge múmkindik berdi.

Eýrooblıgatsııalar London qor bırjasynda, Astana halyqaralyq qarjy ortalyǵynyń bırjasynda jáne Qazaqstan qor bırjasynda lıstıngke engiziledi.

Ornalastyrý nátıjesinde Qarjy mınıstrligi buryn shyǵarylǵan jáne buryn tartylǵan eýrooblıgatsııalardy tolyq kólemde qaıta qarjylandyrdy.

Osyǵan deıin Qarjy mınıstrligi tabysyn jasyrǵan 438 blogerge qatysty tekserý júrgizetini týraly jazdyq.