Qarjy mınıstrligi 2025 jyly qansha adam deklaratsııa tapsyratynyn aıtty

ASTANA. KAZINFORM – 2023 jyly 13 mln adam deklaratsııa tapsyrady. Bul týraly Qarjy mınıstrliginiń Memlekettik kirister komıteti tóraǵasynyń orynbasary Qaırat Mııatov aıtty.

«Tórtinshi kezeńde, 2025 jylǵy 1 qańtardan bastap azamattardyń qalǵan 6,4 mln-nan astam sanatyn qamtý josparlanǵan. Mysaly, jeke qurylymdardyń qyzmetkerleri, zeınetkerler, úı sharýasyndaǵy áıelder, stýdentter jáne basqalary. Jalpyǵa birdeı deklaratsııalaý júıesine shamamen 13 mln adam enedi dep josparlanǵan», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń dereginshe, jalpyǵa birdeı deklaratsııalaýdyń birinshi kezeńinde 2021 jyldyń 1 qańtarynan bastap 580 myńǵa jýyq memlekettik qyzmetshi jáne olarǵa teńestirilgen adamdar, sondaı-aq olardyń jubaılary «kirý» deklaratsııasyn tapsyrdy. Ekinshi kezeńde, 2023 jyldyń 1 qańtarynan bastap deklaratsııany memlekettik mekemeler men kvazımemlekettik sektordyń shamamen 2,1 mln qyzmetkeri, sondaı-aq olardyń jubaılary tabys etti.

«Úshinshi kezeńde, 2024 jyldyń 1 qańtarynan bastap deklaratsııany shamamen 3,9 mln jeke tulǵalar tapsyrady. Olar zańdy tulǵalardyń basshylary men quryltaıshylary, dara kásipkerler, sondaı-aq olardyń jubaılary. Aktıvter men mindettemeler týraly «kirý» deklaratsııasyn 2024 jylǵy 1 qańtardaǵy jaǵdaı boıynsha zańdy tulǵalardyń basshylary, quryltaıshylary, qatysýshylary, dara kásipkerler, sondaı-aq olardyń jubaılary, onyń ishinde áreketsiz jáne qyzmetin toqtatqan kásipkerlerde usynady. Fılıaldar men ókildikterdiń basshylary deklaratsııany usynýǵa mindetti emes. Sonymen qatar 2024 jyly jeke praktıkamen aınalysatyn adamdar, atap aıtqanda notarıýstar, advokattar, jeke sot oryndaýshylary jáne kásibı medıatorlar «kirý» deklaratsııasyn usynbaıdy», - dedi Qaırat Mııatov.