Qarjy mınıstrligi 1500 AEK-ke deıingi boryshty kepilsiz bólip tóleýdi engizýdi josparlap otyr
ASTANA.KAZINFORM – Qarjy mınıstrligi 1500 AEK-ke deıingi salyqtyq bereshegi bar azamattarǵa kepilsiz bólip tóleý usynýdy josparlap otyr. Osyǵan baılanysty mınıstrlik «Ashyq NQA» portalynda tıisti buıryq jobasyn jarııalady.
Buıryq jobasy memlekettik kirister organyna 1500 AEK-ke deıingi salyqtyq bereshegi bar jáne ýaqytsha qarjylyq qıyndyqqa tap bolǵan salyq tóleýshilerge kepilsiz bólip tóleý tártibi men sharttaryn aıqyndaýǵa múmkindik beredi.
– Jobanyń maqsaty – 1500 AEK-ke deıingi salyqtyq bereshegi bar jáne ýaqytsha qarjylyq qıyndyqtarǵa tap bolǵan salyq tóleýshilerge kepilsiz bólip tóleýdi usyný. Buǵan sáıkes, boryshkerge kepil múlkin baǵalaý nemese ony mindetti saqtandyrý talap etilmeıdi, sondaı-aq bólip tóleý merzimderi qysqarady, – delingen habarlamada.
Sonymen qatar buıryq jobasy Qazaqstan Respýblıkasynyń Salyq kodeksiniń 49, 113, 133-baptary jáne «Memlekettik kórsetiletin qyzmetter týraly» zań talaptaryn iske asyrýǵa baǵyttalǵan.
Buǵan deıin Premer-mınıstrdiń orynbasary — Ulttyq ekonomıka mınıstri Serik Jumanǵarın jyl sońyna deıin Salyq kodeksine ózgerister engizilýi múmkin degen edi.
