Qarjy mınıstri salyq salýdyń servıstik modeli qalaı iske asatynyn túsindirdi
ASTANA. KAZINFORM — Qarjy mınıstri Mádı Takıev Úkimet otyrysynda salyqty ákimshilendirýdiń servıstik modeli qazirgi júıeden nesimen erekshelenetinin aıtty.
— Negizgi tásil — «baqylaý úshin ǵana baqylaý» saıasatynan ketip, salyq tóleýshi júıege tirkelgen sátten bastap onyń búkil qyzmetine servıstik súıemeldeýge kóshemiz. Bul Memlekettik kirister komıtetiniń ekinshi deńgeıdegi bankterdiń jáne basqa da tsıfrlyq arnalardyń platformalarynda elektrondyq servıster men ıntegratsııalardy damytý arqyly qamtamasyz etiledi. Onyń ishinde:
* deklaratsııalardy aldyn ala toltyrý jáne avtomatty túrde deklaratsııalaý;
* salyq esebin berý merziminiń bastalýy sııaqty mańyzdy oqıǵalar týraly push-habarlamalar jiberip otyrý;
* memlekettik bajdy avtomatty túrde qaıtarý nemese salyqtardy esepke jatqyzý sııaqty jekelegen protsesterdi «ótinishsiz» formatta kórsetý kózdelip otyr, — dedi mınıstr.
Sondaı-aq, ol Memlekettik kirister komıtetiniń platformasy qosylǵan qun salyǵyn tóleýshi retinde tirkelgen kásipkerlerdi elektrondyq shot-faktýralarymen jumys isteý tártibi, qosylǵan qun salyǵy boıynsha bazalyq uǵymdar, elektrondyq shot faktýralaryn jazyp berýdiń jáne deklaratsııany tapsyrýdyń negizgi merzimderi týraly bazalyq oqýdan ótkizetinin aıtty.
Aıta keteıik, búgingi Úkimet otyrysynda mıkro jáne shaǵyn bıznesti qoldaý sharalaryn talqylanyp jatyr.