Qarjy mınıstri respýblıkalyq bıýdjettiń negizgi kórsetkishterin atady
ASTANA. KAZINFORM — 2027 jyly respýblıkalyq bıýdjet tapshylyǵy 4,6 trln teńgeni quraıdy. Bul týraly Quryltaı otyrysynda «2027-2029 jyldarǵa arnalǵan respýblıkalyq bıýdjet týraly» zań jobasyn tanystyrǵan Qarjy mınıstri Mádı Tákıev aıtty.
— Zań jobasy Bıýdjet kodeksine sáıkes 2030 jylǵa deıingi áleýmettik-ekonomıkalyq damý boljamy negizinde ázirlendi. Elimizdiń negizgi qarjylyq qujatyn ázirleý barysynda, aǵymdaǵy ekonomıkalyq jaǵdaı, barlyq bıýdjettik jáne makroekonomıkalyq táýekelder eskerildi. Basty maqsat — ekonomıkalyq ósimdi yntalandyrý, qarjylyq tártip jáne memlekettiń azamattar aldyndaǵy barlyq áleýmettik mindettemelerin tolyq oryndaý arasynda teńgerimdi saqtaý. Bul bıýdjettiń negizgi elementi — adamǵa jáne adam ıgiligine baǵyttalǵan ınvestıtsııalar. Sonymen qatar, memlekettik qoldaý sharalary arqyly, bıznesti jáne otandyq óndirýshilerdi qoldaýǵa da tıisti kóńil bólinip otyr, — dedi mınıstr.
Osy oraıda Mádı Tákıev 2027 jyldyń mynadaı úsh negizgi kórsetkishin atady:
— kirister — 25,4 trln teńge;
— shyǵystar — 30,2 trln teńge;
— bıýdjet tapshylyǵy — 4,6 trln teńge nemese jalpy ishki ónimniń 2,3 paıyzy.
— Bul rette bıýdjet tapshylyǵy 2029 jyly 0,4 paıyzǵa deıin birtindep tómendeıdi.
Memlekettiń menshikti kiris bazasy nyǵaıyp keledi. Ol 2029 jylǵa qaraı 23,4 trln teńgege deıin ósedi, — dedi ol.
Buǵan deıin baǵa turaqtylyǵynda táýekelder saqtalyp otyrǵanyn jazǵan edik.
