Qarjy mınıstri atyraýlyq bıznes ókilderimen jańa Salyq kodeksi normalaryn talqylady
ASTANA. KAZINFORM – Qarjy mınıstrligi jańa Salyq kodeksindegi normalardy talqylaý maqsatynda óńirlerde bıznes ókilderimen kezdesýlerdi ótkizýdi jalǵastyryp keledi. Bul joly Qarjy mınıstri Mádı Takıev bastaǵan delegatsııa Atyraý oblysyna boldy.
Atalǵan óńir kezdeısoq tańdalǵan joq. Óıtkeni, 2023 jyly elimizdegi ónerkásip óndirisiniń jalpy kóleminiń 24 paıyzy Atyraý oblysyna tıesili boldy. Sonymen qatar óńir ınvestıtsııa tartý boıynsha respýblıkalyq reıtıngte kóshbasshy orynǵa ıe.
Oblys ortalyǵynda ótken kezdesýge halyqaralyq jáne otandyq munaı kompanııalarynyń ókilderi men Atyraý, Aqtóbe, Mańǵystaý, Batys Qazaqstan jáne Qyzylorda oblystarynyń kásipkerleri qatysyp, onyń barysynda munaı salasyna salyq salý máselesi pysyqtaldy. Bul oraıda Qarjy mınıstri Mádı Takıev, Ulttyq ekonomıka vıtse-mınıstri Azamat Ámrın jáne QR QM MKK tóraǵasynyń orynbasary Janybek Nurjanov Parlament Májilisiniń qaraýynda jatqan Salyq kodeksindegi jańashyldyqtar týraly aıtyp berdi.
«Munaı salasy bıýdjet túsimderiniń edáýir úlesin qamtamasyz ete otyrǵan ulttyq ekonomıkanyń negizgi draıverleriniń biri bolyp sanalady jáne solaı bolyp qala beretini kúmánsiz. Bizdiń maqsatymyz – barlyq taraptyń: memlekettiń, bıznestiń jáne tutastaı qoǵamnyń múddelerin eskeretin salyq salý júıesin qurý. Aldymyzda salanyń ornyqty damýyna yqpal etetin, ınvestıtsııalardy yntalandyryp, ınnovatsııalyq tehnologııalardy engizetin tıimdi jáne ádil salyq júıesin qurý boıynsha mindetter tur», - dedi Mádı Tókeshuly.
Vedomstvo basshysy jańa Salyq kodeksiniń jobasynda salyqtar men bıýdjetke tólenetin basqa da mindetti tólemder sany azaıatynyn atap ótti. Mańyzdy fıskaldy qaıtarymsyz tólemderdi alyp tastaý jáne olardyń keıbirin biriktirý josparlanǵan. Júıelik sharalar retinde salyqtyq jeńildikter uǵymyn naqty retteý usynylyp otyr.
Ulttyq ekonomıka vıtse-mınıstri Azamat Ámrın jańa óndiristerge ınvestıtsııalardy yntalandyrýmen qatar Salyq kodeksiniń jobasy eski sarqylyp jatqan ken oryndaryndaǵy óndiristi qoldaýǵa baǵyttalǵanyn aıtty.
«Munaı-gaz jáne taý-ken salalary bıýdjet kiristeriniń kóp bóligin qamtamasyz etetinin eskere otyryp, jańa sharalar bıýdjetke túsetin túsimderdi, sondaı-aq jumys oryndaryn turaqty ustaýǵa múmkindik beredi. Bul jumys istep turǵan nemese jańa ken oryndaryn barlaý áleýeti bar óńirlerdi damytý úshin mańyzdy», - dedi vıtse-mınıstr.
Al Memlekettik kirister komıteti tóraǵasynyń orynbasary Janybek Nurjanovtyń aıtýynsha, jańa Salyq kodeksinde josparly tekserýlerdi júrgizý tártibi ózgertildi. Mundaı is-sharalardy taǵaıyndaý salyq tóleýshiniń qyzmetin taldaý qorytyndylary boıynsha júrgiziletin bolady. Sonymen qatar tekserýler elektrondy formatqa aýystyrylady.
«Memleket basshysynyń Qazaqstan halqyna Joldaýynda salyqtyq ákimshilendirýdi tsıfrlandyrýdyń strategııalyq mańyzdylyǵy týraly aıtylǵany belgili. Sondyqtan sybaılas jemqorlyq táýekelderin azaıtý jáne ashyqtyqty qamtamasyz etý úshin Qarjy mınıstrligi salyq salasyndaǵy protsesterdi elektrondy formatqa kóshirýdi jedeldetýdi qolǵa aldy», - dep qorytyndylady Mádı Takıev.
