Qarjy agenttigi borysh júktemesin azaıtýǵa baǵyttalǵan jańa qaýly jobasyn usyndy

ASTANA. KAZINFORM — Qarjy naryǵyn retteý jáne damytý agenttigi «Ekinshi deńgeıdegi bankterge, Qazaqstan Respýblıkasynyń beırezıdent-bankteriniń fılıaldaryna arnalǵan táýekelderdi basqarý jáne ishki baqylaý júıesin qalyptastyrý qaǵıdalaryn bekitý týraly» Qazaqstan Respýblıkasy Ulttyq Banki Basqarmasynyń 2019 jylǵy 12 qarashadaǵy № 188 qaýlysyna ózgerister men tolyqtyrýlar engizý týraly» Agenttik Basqarmasy qaýlysynyń jobasyn ázirledi.

— Joba bank qyzmetin retteý máseleleri boıynsha normatıvtik quqyqtyq bazany jetildirý maqsatynda ázirlendi jáne tutynýshylyq kredıt berýdiń ósý qarqynyn shekteýge jáne azamattardyń shamadan tys borysh júktemesin boldyrmaýǵa baǵyttalǵan, — delingen agenttik habarlamasynda. 

Jobada sońǵy 12 aıda 90 kúnnen asa keshiktirilgen qaryzy bar qaryz alýshylar úshin borysh júktemesiniń koeffıtsıentin (BJK) 0,5-ten 0,25-ke deıin tómendetý kózdeledi, bul osy qaryz alýshylardyń artyq mindettemeler alý múmkindigin shekteýge jáne qaıta defolt yqtımaldyǵyn azaıtýǵa múmkindik beredi.

Budan basqa, tómendegideı talaptardyń biri bolǵan kezde kepilsiz tutynýshylyq qaryzdardy berýge shekteý engiziledi:

— banktik qaryzdar boıynsha kúntizbelik 30 kúnnen asa jáne (nemese) mıkrokredıtter boıynsha 1 kúnnen asa tólem merzimi ótken kezde;

— 2025 jylǵy 1 shildeden bastap sońǵy 36 aıda negizgi borysh jáne (nemese) syıaqy boıynsha tolyq keshirilgen bereshek bolǵan kezde;

— sońǵy 12 aıda qaryz alýshynyń óz mindettemelerin tıisinshe oryndaýyna yqpal etpegen qaıta qurylymdaý júrgizilse.

Qujattyń tolyq mátinimen Agenttiktiń ınternet-resýrsynda tanysýǵa bolady.

Aıta keteıik, Qazaqstanda biryńǵaı qarjy ombýdsmeni ofısi qurylady.