Qarjaýbaı Sartqojaulynyń tórt kitaby jaryq kórdi
18-mamyr - Túrki jazýy kúnine oraı jáne ǵalymnyń 70 jyldyq mereıtoıy qarsańynda Astanada L.N.Gýmılev atyndaǵy Eýrazııa ulttyq ýnıversıtetinde «Baıyrǵy Túrki qundylyqtary - 2017» atty halyqaralyq konferentsııa uıymdastyryldy. Oǵan otandyq túrkologtarmen, qatar Túrkııa, Ońtústik Koreıa, Mońǵolııanyń belgili ǵalymdary qatysyp, túriktanýdyń ózekti máseleleri men bolashaq damý baǵyttaryn talqylap jatyr. Sondaı-aq, halyqaralyq konferentsııada N.Á.Nazarbaevtyń «Bolashaqqa baǵdar: rýhanı jańǵyrý» atty maqalasynda kórinis tapqan «Týǵan jer»,«Qazaqstannyń kıeli jerleriniń geografııasy» syndy jobalaryna ǵylymı turǵydan úles qosý, túriktildes memleketterdiń mádenı órkenıeti ıntegratsııasyn jasaý kózdelgen.
Sonymen birge, konferentsııa aıasynda Q.Sartqojaulynyń «Úısin handyǵy», «Tas kitaptyń qupııasy», «Tasta qalǵan taǵylym», «Zapıskı kazahskogo tıýrkologa» atty jańa tórt kitabynyń tusaýy kesildi. Munda ǵalymnyń kóne túrik qundylyqtaryn zerttegen ǵylymı maqalalary qamtylǵan.
Saltanatty sharaǵaQR Memlekettik syılyqtyń ıegeri, QR Parlamentiniń eks-depýtaty Aldan Smaıyl, L.N.Gýmılev atyndaǵy EUÝ-niń «Otyrar Kitaphanasy» ǴZO dırektory, f.ǵ.doktory Tursyn Jurtbaı, UR UǴA akademıgi, ǵalym, antropolog Orazaq Smaǵul, Ystanbul qalasyndaǵy «Yedi Tepe»Ýnıversıteti. t.ǵ.d., professor Ahmed Tashaǵyl, (Túrkııa), ońtústikkoreıalyq ǵalym Heo Heýn Sık syndy ǵalymnyń úzeńgiles dostary, áriptesteri kelip, júrekjardy lebizderin bildirdi. Ǵalym týyp-ósken Baı-Ólke aımaǵy ákiminiń orynbasary Shárip Qabyl, Baı-Ólke máslıhatynyń hatshysy Arystan Serikbolat jáne tarıh ǵylymdarynyń kandıdaty, aqyn Rahmet Suraǵan Mońǵolııadan arnaıy kelip, Q.Sartqojaulynyń qazaq tiliniń, mádenıetiniń jáne dástúriniń saqtalýyna úlken úles qosqanyn atap ótti jáne «Baı-Ólkeniń qurmetti azamaty» ataǵyn tabys etti.
Qarjaýbaı Sartqojaulynyń esimi kózi qaraqty oqyrmanǵa jaqsy tanys. Ol Túrik qaǵanatynyń memlekettik tiliniń de, Orhon mátinderiniń tiliniń de qypshaq tili bolǵanyn dáleldep, «Kók Túrikter eskertkishiniń tili uıǵyr tili» degen tujyrymdy teriske shyǵarǵan. Mońǵolııadan kóshpendiler mádenıeti, kóne túrik tarıhy, jazý emlesine qatysty qundy jádigerlerdi Astanaǵa tasyp, álemde balamasy joq «Kóne jazý tarıhy mýzeıin» ashqan. Búginde ol - Kemal Atatúrik atyndaǵy Túrik tarıhy qurymynyń (akademııasynyń) tolyq múshesi, fılologııa ǵylymdarynyń doktory, Túrkitaný jáne Altaıtaný ǵylymı-zertteý ortalyǵynyń dırektory, «Kúltegin» syılyǵynyń laýreaty.
