Qarjaýbaı Nurymov Sherzattyń qashan jan tapsyrǵanyn aıtty

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Buǵan deıin Sherzattyń ákesi Qarjaýbaı Nurymov qaıǵyly oqıǵaǵa alyp kelgen kıkiljiń qalaı bastalǵanyn baıandady. 

Qarjaýbaı Nurymov oqıǵany baıandaý barysynda jaraqat alǵan Sherzat Polat pen Nurqanat Ǵaıypbaevty qalaı emhanaǵa aparǵanyn eske aldy.

— Ajyratqanǵa, «qoı» degenge eshqaısysy qaraǵan joq. Sherzattyń anasy balasyn qushaqtap, urǵyzbaı jatty. Sóılep otyrǵan balany Nurqııas myltyqpen urdy. Anasynyń jylaýyna, ótinishine qaramady. Balaǵa pyshaq tyqqanyn bilmedim. Balaǵa soqqy tıdi ma dep aldynan qaradym, sóıtsem jaýyrynyna kiripti. Artynan qan aǵyp jatyr eken. Nurqanat ta es-tússiz jatty. Kólikti otaldyryp kelgende ekeýinde de pýls boldy. Olardy ózim kólikke saldym. Aýrýhanaǵa apara jatqan kezde kólikti qatty aıdaǵannan balam oryndyqtan qulap ketti. Sodan toqtadym. Sóıtsem jany (Sherzat) shyǵyp ketipti. Pýls bolmaı qaldy. Ózim reanımatsııa jasadym. Sosyn ári qaraı aýrýhanaǵa jetkizdim, — dedi ol.

— Kóliktiń ishinde jan tapsyrdy ma? — dep naqtylady prokýror.

— Men kólikke salyp jatqan kezde jan tapsyryp jatty, sońǵy demderi, — dedi jábirlenýshi.

Eske salaıyq, buǵan deıin sotta Sherzat óliminiń negizgi sebebi ataldy.

Sondaı-aq Nurqanat Ǵaıypbaevtyń janjal barysynda qandaı jaraqat alǵany aıtyldy.

Prokýror oqıǵanyń tolyq hronologııasyn baıandady. 

Aıyptalýshylardyń kópshiligi kináni moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy. 

Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.