Qarjaýbaı Nurymovtyń ústinen qylmystyq is qozǵala ma - Bas prokýratýra jaýaby
ASTANA. KAZINFORM – Bas prokýrordyń orynbasary Áset Shyndalıev Májilistiń jalpy otyrysynan keıin jýrnalısterdiń suraǵyna bergen jaýabynda Sherzat isine baılanysty sottyń qalaı ótkeni týraly paıymyn aıtty.
- Sherzat Polattyń soty boıynsha aıtsaq, úkim áli kúshine zańdy engen joq. Taraptardyń bárinde shaǵym túsiretindeı merzimi bar. Biraq protsestiń ózin kórgisi kelgen qazaqstandyqtardyń bárinde múmkindik boldy dep oılaımyn. Protsess óte sapaly, ashyq, obektıvti ótkizildi dep esepteımin. Úkim shyǵarylǵan kezde búkil dálel, kýá materıaldary eskerildi. Mundaı ashyq protsesterdiń maqsaty sot ádil ótip jatqanyn, eshki eshteńeni búrkemelep otyrmaǵanyn kórsetý edi, - dedi ol.
Sondaı-aq, ol kúdiktilerdiń týystary aıtqan Qarjaýbaı Nurymovty qylmystyq jaýapkershilikke tartý týraly talaptarǵa pikir bildirdi.
- Men kúdiktilerdiń týysqandarynyń nemese ózge bireýlerdiń sózine súıenip qana pikir aıta almaımyn. Qylmystyq is qozǵaý úshin málimet jetkilikti bolý kerek. Іs qozǵaý týraly sheshimdi qylmystyq qýdalaý organy qabyldaıdy, - dedi Bas prokýrordyń orynbasary.
Eske salsaq, 5 maýsymda Jetisý oblysynyń qylmystyq ister jónindegi mamandandyrylǵan aýdanaralyq sotynda 16 jastaǵy Sherzat Polattyń ólimine qatysty qylmystyq is boıynsha úkim jarııalanǵan edi.