Káriz jelileri qaryz jáne kredıt esebinen jańartylady – mınıstr

ASTANA. KAZINFORM – Ulttyq joba aıasynda 45 qalada káriz tazartý qurylǵysy jańǵyrtylyp, 2800 shaqyrym sý burý jáne 5 myń shaqyrym sý qubyry jelisi jańartylady. Bul týraly Ónerkásip jáne qurylys mınıstri Ersaıyn Naǵaspaev málim etti.

- «Kommýnaldyq jáne energetıka sektorlardy jańǵyrtý» ulttyq jobasy aıasynda 45 qalada káriz tazartý qurylǵysy jańǵyrtylyp, 2800 shaqyrym sý burý jáne 5 myń shaqyrym sý qubyry jelisi jańartylady. Káriz jelilerin jańartý halyqaralyq qarjy ınstıtýttarynyń qaryzdary, oblıgatsııalyq qaryzdar, respýblıkalyq bıýdjet jáne bıýdjettik kredıtteý sııaqty túrli qarjylandyrý kózi esebinen josparlanyp otyr, - dedi Ersaıyn Naǵaspaev Úkimet otyrysynda.

Osy oraıda mınıstr sý tarıfiniń ósýine jol bermeý úshin qoldanystaǵy káriz jelilerin jańǵyrtý qajet dep otyr.

- Sondaı-aq ekologııalyq qaýipsizdikti basshylyqqa ala otyryp, káriz júıelerin jańartý jumystary eń aldymen eldi mekenderde júrgiziledi. Qazir tazartý nysandaryn jobalaý, salý jáne paıdalaný tásilderi qaıta qaralyp, jobalarǵa revızııa júrgizilip jatyr. Olardyń tıimdiligin arttyrý úshin tehnıkalyq operator ınstıtýty engizildi. Tehnıkalyq operator jobalardyń barlyq kezeńin qadaǵalap, qazaqstandyq ónimdi qoldaný talaptaryn eskeredi. Bul sharalar jobadaǵy qatelikterdi azaıtyp, shyǵynnyń artýy men merzimniń keshigýine jol bermeıdi, - dep tolyqtyrdy vedomstvo basshysy.

Aıta keteıik, 2027 jylǵa deıin sý esepteý júıesin tolyq tsıfrlandyrý josparlanyp otyr. 

Elimizde ulttyq sý resýrstary aqparattyq júıesi ázirlenip jatyr.