Qaryzyn qaıtarmaý úshin, kredıtoryn tapsyryspen óltirýge bel býdy
ASTANA. 1 tamyz. QazAqparat - Qaraǵandy oblysy ІІD jedel qyzmetkerleri Reseı Federatsııasy Vladımırsk oblysyndaǵy áriptesteriniń kómegimen 2009 jyly Qaraǵandy qalasynyń 60 jastaǵy turǵynyn óltirýge tapsyrys bergen qylmyskerdi ustady.
Aldaǵy ýaqytta kúdikti, 28 jastaǵy Qazaqstan azamaty elimizge ekstradıtsııalanady. Bul týraly ІІM baspasóz qyzmetinen habarlandy.
Tergeý barysynda anyqtalǵandaı, qylmysker jábirlenýshige 4,5 myń AQSh dollaryna bereshek bolǵan eken. Osy qarajatty qaıtarmaýdy oılaǵan ol 2009 jylǵy naýryz aıynyń basynda óz tanysyna 500 AQSh dollaryn berip, kredıtoryn óltirýge kóndiredi.
Alaıda, adam óltirýshi kóp uzamaı polıtsııa qyzmetkerleriniń qolyna túsip, keıinnen 10 jylǵa bas bostandyǵynan aıyrylady. Al tapsyrys berýshige izdeý jarııalanǵan bolatyn. Qazirgi ýaqytta ustalǵanǵa qatysty ony Qazaqstanǵa ekstradatsııalaý máselesi sheshilýde.
