Qaryzy bar azamattarǵa shetelge barýǵa tyıym salynady
ASTANA. QazAqparat - Jadyraǵan jazda demalysqa shyǵyp, saparǵa shyǵatyndar sany artady. Qazaqstandyqtar otandyq «Býrabaı», «Saryaǵash» shıpajaılaryna barady, Almaty mańyndaǵy taýlarda demalady jáne t.s.s. Degenmen, adamdardyń basym bóligi sheteldik kýrorttardy tańdaıdy. Olar kóbinese Túrkııa, BAÁ, Grekııa jáne Taıland elderinde demalady.
Biraq qazaqstandyqtar kópten kútken demalysyna barmaı qalmas úshin sot aktileri boıynsha qaryzdaryn ýaqytyly óteýi tıis. Boryshkerler memlekettik shekaradan asyp kete almaıdy, óıtkeni sot oryndaýshysy «Atqarýshylyq is-júrgizý jáne sot oryndaýshylarynyń mártebesi týraly» QR zańyna sáıkes boryshkerdiń Qazaqstannan tys shyǵýyna ýaqytsha shekteý qoıý týraly qaýly shyǵarýǵa quqyly. Qandaı da bolmasyn qaryzyń bolsa, alıment, nesıe men zaımdardy, salyqtardy, aıyppuldardy, TKSh jáne basqa da tólemderdi tólemeseń shetelge barmaı qalýyń múmkin.
QR Ádilet mınıstrligi qyzmetkerleriniń aıtýynsha, óndirip alýshymen eki jaqty kelisimge qol jetkizilgen jaǵdaıda nemese qaryzdy tolyq qaıtarǵanda ǵana shetelge barýǵa ruqsat alýǵa bolady. Sodan keıin azamattar elden tys shyǵýǵa tyıym salý sanktsııalary tiziminen alynyp tastalady jáne olardyń saıahatqa shyǵýlaryna bolady. Sonymen qatar, Qazaqstannan tys jerlerde em-dom qabyldaý qajet bolǵan jaǵdaıda shetelge barýǵa tyıym salý toqtatylýy múmkin, dep jazady astana.gov.kz.
