«Qaryzsyz qoǵam» jobasy aýyl turǵyndaryna nesıe alýdyń jaýapkershiligin úıretip jatyr
Bul joba qazaqstandyqtardyń qarjylyq mádenıeti men kredıttik tártibin arttyrý úshin pármendi qural bolady dep kútilip otyr.
«Qarjylyq saýat boıynsha tegin kýrstar AMANAT partııasynyń aýdandyq fılıaldarynda ótedi. Oqytý bes kúnge sozylady. Trenıng nátıjesinde qatysýshylar otbasy bıýdjetin qalyptastyrý joldaryn, ony josparlaý men bólýdiń negizgi algorıtmderin, nesıe alý erejeleri men qaıtarý protsesin, qarjy pıramıdalary men alaıaqtar tuzaǵyna túspeý joldaryn, bıznes jobalardy qarjylandyrý kózderin úırenedi», - dep jazylǵan partııa habarlamasynda.
Jaýapty sala mamandary jergilikti halyqtyń oqýǵa yntasy mol ekenin aıtyp otyr.
«Bul jerde halyqty mazalaıtyn basty suraq – bankke beresheginiń kóbeıip ketkeni, osy qaryzdardan qalaı qutylamyz, aldaǵy ýaqytta qaryzǵa batpaý úshin ne isteý kerek dep oılaıdy. Oǵan qosa kásipkerlik jaǵynan da kóp suraqtar týyndap jatyr. Bizdiń sabaǵymyz 5 kún bolady, túske deıin tek qana teorııa oqytylsa, tústen keıin – ár qatysýshymen jeke konsýltatsııa jasalyp, báriniń máseleleri qaralady», - dep túsindirdi oqytýshy, qarjy sarapshysy Jandos Ázimbaı.
Máselen, Túrkistan oblysy Saýran aýdanynyń turǵyny Sandýǵash Nazarseıitova jubaıymen qosymsha jumys istese de, baspana salýǵa qarajat jetpeı, nesıe alǵan. Onyń ústemeaqysy kóp ekenin bilmegen.
«Kez kelgen ýaqytta qarajattan qınalsaq, bankke kerek somamyzdy jazamyz, olar bere salatyn. Onyń protsentine qaramaıtynbyz, aı saıyn tólep otyrsaq qutylarmyz degen oımen nesıeni kóp aldyq. Endi búgin qarjylyq saýatymyzdy arttyryp, ómirimizdi jaqsy jaqqa ózgertkimiz keledi. Osy shara paıdasyn molynan tıgizip jatyr», - dedi S. Nazarseıitova.
Oqý barysynda qarjy mamandarynan bólek zańgerlerdiń kómegi usynylady.
Olar ár turǵynnyń nesıe tarıhyn jeke zerttep, qaryz júktemesin azaıtý boıynsha quqyqtyq keńesterin beredi.
Eske sala keteıik, «AMANAT» partııasy Halyk Bank-pen birlesip, «Qaryzsyz qoǵam» jobasynyń bastalǵanyn jarııalap, tıisti memorandýmǵa qol qoıǵan bolatyn.
Atalmysh joba mamyr aıynda bastalyp 2023 jyldyń qarasha aıyna deıin jalǵasady.
Oqýǵa kez kelgen nıet bildirýshi qatysa alady.
Tirkelý úshin turǵylyqty jerdegi AMANAT-tyń aýdandyq fılıalyna habarlasý qajet.
