Qaryzǵa batqan azamattar men kedeı adamdar kóbeıip barady - Memleket basshysy

NUR-SULTAN. QazAqparat - 1 mıllıonǵa jýyq adamnyń tabysy eń tómengi kúnkóris deńgeıine de jetpeıdi. Bul týraly Úkimettiń keńetilgen otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Birinshi - halyqtyń tabysyn arttyrý jáne teńsizdikti azaıtý. Tabys tabý - azamattardyń turmys sapasyn jaqsartýdyń jáne bolashaqqa degen senimin nyǵaıtýdyń basty faktory. Ókinishke qaraı sońǵy kezde jurttyń tabysy ekonomıkalyq ósimniń emes, áleýmettik transferttiń esebinen kóbeıdi. Ashyǵyn aıtqanda járdemaqymen jáne zeınetaqymen ǵana kún kórip otyrǵandar az emes», - dedi Memleket basshysy.

QR Prezıdenti sońǵy 5 jylda halyqtyń jalpy tabysyndaǵy eńbek kirisiniń úlesi 80 paıyzdan 67 paıyzǵa deıin qysqaryp ketken. Al áleýmettik transfertter 17-den 29 paıyzǵa deıin ulǵaıǵan.

«Budan azamattardyń kirisi alatyn jalaqysyna emes bıýdjet shyǵysyna táýeldi ekenin baıqaýǵa bolady. Bul az deseńiz jumys berýshilerdiń paıdasymen jáne naryqtaǵy baǵanyń kóterilýimen salystyrǵanda eńbekaqy álde qaıda baıaý ósýde. Sonyń saldarynan qaryzǵa batqan azamattar men kedeı adamdar kóbeıip barady», - dedi Qasym-Jomart Toqaev.