Qaryzdy óteý úshin Shymkenttegi jylý ortalyǵynyń 20% aktsııasy satylady
ShYMKENT. QazAqparat - Shymkent qalasynyń ákimdigi jylý ortalyǵynyń qaryzyn qaıtarý úshin onyń 20 paıyz aktsııasyn satatyn boldy. Bul týraly qalalyq turǵyn úı-kommýnaldyq sharýashylyq bóliminiń basshylyǵy málimdedi, dep habarlaıdy QazAqparat HAA tilshisi.
Qazir «3-Energoortalyqtyń» gaz tasymaldaýshy mekeme aldyndaǵy bereshegi 1,5 mıllıard teńgeden asyp ketken. Al, buǵan deıin kóktemde «QazTransGazAımaq» AQ-y qaryzdy qaıtarmaǵany úshin iri óndiris ornyn kógildir otynnan ajyratyp tastaǵan. Sonyń saldarynan ortalyq ystyq sý men elektr qýatyn óndirý múmkindiginen aıyryldy. Keıinnen bul máselege shahar basshylyǵy aralasyp, úshjaqty kelisim negizinde jylý tasymaldaýshy mekeme qaryzynyń 805 mıllıon teńgesin qaıtarǵan edi.
«Qazir memleketke tıesili 20 paıyz aktsııasyn satyp, osy qaryzdy jabaıyn dep otyrmyz. Alda ondaı másele kezdespeıdi degen oıdamyz. Óıtkeni, resmı túrde tarıfter belgilenip qoıdy», - deıdi Shymkent qalalyq turǵyn úı-kommýnaldyq sharýashylyq bóliminiń basshysy Nurlan Bektursynov.
Jalpy, qaryzdardyń kóbeıip ketý sebebin mamandar jylý úshin tutynýshylardan aqy alatyn «Qýat jylý ortalyǵy-3» memlekettik mekemesiniń ýaqytyly aqsha jınamaýynan boldy dep túsindiredi. Qazir shymkenttikterdiń jylý úshin bereshegi 154 mıllıonǵa jetken. ıAǵnı, deldal mekeme 20 qyrkúıekke deıin 1 mlrd 540 mıllıon teńgeni ótese, ortalyq gazdyń aldyndaǵy qaryzdan qutylady. Sonda stansanyń jumysy qalypty jaǵdaıǵa túsedi,- deıdi sala mamandary.
Qazir qaladaǵy 1811 kópqabatty úı men 352 memlekettik mekemeniń basym bóligi jylý qabyldaýǵa daıyn. Al qalǵan úıler men jylý júıelerin almastyrý men magıstraldy jańǵyrtý jumystary maýsymǵa deıin tolyq bitedi dep josparlanyp otyr. Sondaı-aq jylý óndirýshi mekeme qarjylyq qıyndyqtarǵa qaramastan úsh qazandyq pen eki týrbınaǵa qajetti jóndeý jumystaryn júrgizip qoıypty. Oǵan gaz berilse, qazandyqtar iske qosyla bermek.
