Qaryz júktemesin azaıtý, halyqtyń ál-aýqatyn kóteredi -Analar keńesi

KÓKShETAÝ. QazAqparat - Qazaqstan halqy Aqmola assambleıasy Analar keńesiniń tóraıymy Zere Qıyqova QR Prezıdenti Qasym-Jomart Toqaev qol qoıǵan el azamattarynyń qaryz júktemesin azaıtý týraly Jarlyqqa qatysty óz oıyn bildirdi, dep habarlaıdy QazAqparat tilshisi.

«Qazaqta «Otan otbasynan bastalady» degen jaqsy sóz bar. Ata-babalardan qalǵan qasıetti sózdiń mán-maǵynasy óte tereńde jatyr. Tereńirek úńilip, aqylmen oılanyp qaraıtyn bolsaq, árbir otbasy óz aldyna jeke bir Otan. Al, otbasynyń ál aýqaty - elimizdiń damýynyń, órkendeýiniń ólshemi. Elbasy Nursultan Nazarbaev osyǵan deıin az qamtylǵan otbasylardyń tabysyn arttyrý, turǵyn úı máselesin sheshý, densaýlyq saqtaý jáne bilim berý salalaryn jaqsartý boıynsha áleýmettik bastamany kótergen bolatyn. Elbasy muny tekten tek aıtqan joq. Elimiz aldymen ekonomıkasyn jaqsartyp aldy. Endigi kezekte halyqtyń jaǵdaıyn kóterý, ıaǵnı, ata-ana qamqorlyǵynsyz óskender men kópbalaly jáne áleýmettik jaǵynan áljýaz toptarǵa jatatyn otbasylardy memleket qamqorlyǵyna alý. ıAǵnı, sózben emes, naqtyly ispen turmystyq jaǵdaıyn jaqsartý. Osy oraıda, jańa Prezıdent Qasym-Jomart Toqaev osy bastamany jalǵastyrý maqsatynda el azamattarynyń qaryz júktemesin azaıtý týraly Jarlyqqa qoıdy. Bul degenimiz halyqtyń turmystyq jaǵdaıy Memleket basshysynyń jiti nazarynda ekenin bildiredi», deıdi Zere Qıyqova.

Sonymen qatar, ol el azamattarynyń qaryz júktemesin azaıtý sııaqty ıgi qadamnyń turmystyq qıynshylyqtardan irgesi shaıqalyp turǵan otbasylardy saqtap, jaǵdaılaryn jaqsartýda ǵana emes, otbasylyq qundylyqtardy saqtaý jáne nasıhattaýda da kórinis tabatynyn aıtýda.

«Máńgilik Eldiń» irgesin berik, keregesin keń, shańyraǵyn bıik etetin ulttyń basty qundylyǵy óreli urpaq, ulaǵaty ári aýqatty otbasy ekenin umytpaǵanymyz jón. Otbasy ál-aýqaty - memleket ál-aýqaty», dep túıindedi Z.Qıyqova.