Qaryz ákeler úshin «Olardy balalary izdeıdi» aqparattyq júıesi iske qosyldy - Prokýratýra
ASTANA. QazAqparat - Alıment óndirý - árdaıym ózekti máselelerdiń biri, óıtkeni, eń aldymen,balalar zardap shegedi. Jyl saıyn respýblıkamyzdyń sottarynda balalaryn baǵyp-kútýge alıment óndirip alý jónindegi 35 myńnan astam azamattyq is qaralady.
«Sonyń saldarynan olardyń kezeńdik sıpatyna qaraı sot oryndaýshylardyń óndirisine jylma-jyl 200 myńnan astam alıment óndirý týraly atqarý qujattary kelip túsedi. Bul tolyq emes otbasynda tárbıelenip jatqan osynsha bala alıment alýǵa muqtaj bolyp otyr degen sóz. Ádette, boryshkerlerdiń basym bóliginiń alıment tóleýge múmkindikteri jetkilikti bolady, alaıda, ártúrli sebeptermen oryndalmaı jatady. Jekelegen jaǵdaılarda olar óz jumys orny men tabysy týraly málimetti qasaqana jasyryp qana qoımaı, ýákiletti organdardan ózderi de jasyrynyp júredi»,-delingen QR Bas prokýratýranyń Quqyqtyq statıstıka jáne arnaıy esepke alý jónindegi komıtetiniń málimetinde. Atap aıtqanda, 2014 jyldan bastap bul komıtetke izdeý salynǵan alıment boıynsha boryshkerlerdiń esebin júrgizý mindeti berildi. 2015 jyldyń 1 sáýirindegi jaǵdaı boıynsha alımentti qasaqana tólemeýshi 399 adam esepke qoıyldy. Osy esep bazasynda boryshkerlerdiń fotosýretterin jarııalaı otyryp «Olardy balalary izdeıdi» atty aqparattyq servıs (portaldyń meken-jaıy: service.pravstat.kz) quryldy. Bul sot oryndaýshylarynan jasyrynyp júrgen boryshkerlerdi izdeýdiń tıimdiligin arttyrady dep kútilýde. «Eń aldymen, bul servıs óndirip alýshylarǵa boryshkerdiń izdeýde júrgenine kóz jetkizýge, sonymen qatar jumys berýshiler, qyzmettester jáne ózge osy máselege beı-jaı qaramaıtyn azamattar tanyǵan jaǵdaıda jasyrynyp júrgen boryshkerdiń ómir súrý jáne jumys orny týraly sot oryndaýshylaryna habarlaýlaryna múmkindik beredi»,-deıdi komıtet ókilderi.
