Qarýmen ustalǵan jigitti prokýror 4 jylǵa sottaýdy surady
ALMATY. QazAqparat - Almatyda №2 Bostandyq aýdandyq sotynda prokýror Dáýren Áleýhandy 4 jylǵa bas bostandyǵynan aıyrýdy surady, dep habarlaıdy QazAqparat tilshisi sot zalynan.
«Dáýren Áleýhanovty QR QK 287-babynyń 3-bólimimen qarý, (jarylǵysh zattardy saqtaý, ustaý, tapsyrý, satý, tasymaldaý) 346-babynyń 1-bólimi (kólik aıdaý quqyǵy joq adamnyń kólikti aıdaýy, araq, esirtki zattaryna mas adamǵa kólikti tapsyrý) boıynsha aıyby tolyq dáleldendi. Sol sebepti QR QK 287-babynyń 3-bólimimen ony 4 jyl bas bostandyǵynan, 346-babynyń 1-bólimi boıynsha 3 jylǵa kólik aıdaý quqyǵynan aıyryp, 300 AEK mólsherinde aıyppul salýdy suraımyn.
QR QK 58-babyna sáıkes Áleýhanovty túpkilikti 4 jylǵa bas bostandyǵynan aıyrýyńyzdy suraımyn», - dedi memlekettik aıyptaýshy Erjan Serjanov.
23 jastaǵy jigit pen onyń tanysy Marlen Shalabaev 2017 jyly qarashada arnaıy operatsııa barysynda ustalǵan bolatyn.
Keıin Marlen Shalabaev kinási dáleldenbegen soń bosatylǵan edi.
Ekeýi Ońtústik Qazaqstan oblysynyń turǵyndary bolyp shyqqan.
Ustalǵandardyń kólikterin tekserý barysynda jaryq-dybystyq avtomat, pyshaq, sondaı-aq, brondy keýdeshe tárkilengen edi. Arnaıy operatsııa kezinde zaqymdalǵan Toyota Land Cruiser 100 kóligi de ustalǵandardyń birine tıesili bolyp shyqqan.
Іsti Bostandyq aýdanynyń sýdıasy Janat Bekjanov qarap jatyr.
Búgin sotta sýdıa is materıaldarymen tanystyrdy.
Belgili bolǵandaı, polıtsııa kólikti toqtatý úshin 8 ret oq atyp toqtatqan.
Aldyńǵy sot otyrysynda aǵa leıtenant Aıdos Janserikuly operatsııa qalaı ótkenin aıtyp berdi.
Sottalýshy óz kinásin moıyndamady. Alaıda ol esirtkige mas bolǵanyn, kólikti qujatsyz aıdaǵanyn moınyna aldy.
