Qarýly tálipter aýǵan qyzdaryn ýnıversıtetke kirgizbeı, kúzetip tur

ASTANA.QazAqparat – Aýǵanstanda Talıban kúshteri ýnıversıtetterdiń mańynda qarýly patrýl ornatyp, stýdent qyzdardyń oqýyna kedergi jasap otyr. Eldegi bılikti basyp alǵan ekstremıstik qozǵalys áıelderdiń joǵary oqý oryndaryna kelýine tyıym saldy. Sonymen qatar, qyrkúıek aıynda orta mektepte oqıtyn qyzdar sabaqtan shettetildi, dep habarlaıdy QazAqparat Euronews-ke silteme jasap.

Áleýmettik jelilerde bir-birimen jylap qoshtasyp jatqan stýdentterdiń vıdeosy taraldy.

«Tálipterdiń áreketi áıelderdi tolyqtaı basyp-janshýǵa baǵyttalǵan. Olar áıelderdiń eldiń damýyna atsalysyp, erlermen birge jumys istegenin qalamaıdy. Olar tek áıelderdiń úıde otyryp, bala tapqanyn durys kóredi», - deıdi Kabýl ýnıversıtetiniń stýdenti Setera Farahmand.

Birneshe professor narazylyq retinde jumysynan ketti, al kóptegen er stýdentter oqýdan shyqty.

Sonymen qatar, sársenbide tálipter áıel muǵalimder men bastaýysh synypta oqıtyn qyzdardy mektepke kirgizbeýdi buıyrǵany týraly da aqparat tarady.

Sarapshylar tálipterdiń sheshimi olardy halyqaralyq deńgeıde moıyndalý múmkindiginen aıyratynyn atap ótti.

Buǵan deıin BUU sarapshylary tálipterdiń Aýǵanstandaǵy áıelder quqyǵyna kózqarasy adamzatqa qarsy qylmys bolýy múmkin ekenin aıtqan.

Eske sala keteıik, tálipter aýǵan áıelderine ýnıversıtette oqýǵa tyıym salǵan edi.

Foto: Wakil KOHSAR / AFP