Qarýly kúzeti joq aqsha aıyrbastaý pýnktterine aıyppul salyndy
NUR-SULTAN. QazAqparat – Qarýly kúzeti joq jáne beıne baqylaý kameralary jumys istemeıtin aqsha aıyrbastaý pýnktterine aıyppul salyndy, dep habarlaıdy QazAqparat UB baspasóz qyzmetine silteme jasap.
«Aqsha aıyrbastaý pýnkteriniń ıeleri qaýipsizdik erejelerin saqtamaǵan. Kásipkerler qarýly kúzet oryndaryn qamtamasyz etpegen, beıne baqylaý kameralary jazba júrgizbegen. Munyń barlyǵy Ulttyq banktiń «Memlekettik retteý týraly» zań aıasynda júrgizgen tekserýi barysynda anyqtaldy. 2019 jyldyń ekinshi jartyjyldyǵynda 2018 jyldyń dál osyndaı kezeńimen salystyrǵanda qozǵalǵan ákimshilik isterdiń sany 2,4 esege artty», - delingen Ulttyq bank taratqan aqparatta.
Munan bólek, aıyrbas pýnktteri klıentter úshin qajetti aqparatty kórneki jerde ornalastyrmaǵan. Aıyrbas operatsııalary jýrnalda kórsetilmegen. Ózderiniń jumystary týraly naqty emes esep jiberip otyrǵan. Keıbir aıyrbas pýnktteri biliktilik talaptaryna saı emes. Olar qarýly kúzetsiz jumys istegen. Al beıne baqylaý kameralary jazba júrgizbegen.
Jalpy, ótken jyldyń ekinshi jartyjyldyǵynda 114 keshendi tekserý júrgizildi. Onyń qorytyndysynda ákimshilik quqyq buzýshylyq týraly 141 hattama toltyryldy. Atalǵan zań buzýshylyqtar Almaty, Shymkent qalalarynda, Shyǵys Qazaqstan, Atyraý, Qaraǵandy, Pavlodar jáne Batys Qazaqstan oblystarynda tirkelgen.
