Qarýly Kúshterimiz ár ýaqytta Táýelsizdigimizdiń basty tiregi bolyp qala beredi - Elbasy
ASTANA. QazAqparat - «Qarýly Kúshterimiz ár ýaqytta Táýelsizdigimizdiń basty tiregi bolyp qala beredi». Bul týraly búgin QR Qarýly Kúshteriniń 25 jyldyǵy men Jeńis kúnine arnalǵan áskerı sherý barysynda Elbasy Nursultan Nazarbaev aıtty, dep habarlaıdy QazAqparat.
«Qarýly Kúshterimiz ár ýaqytta da Táýelsizdigimizdiń basty tiregi bolyp qala beredi. Sizder ózderińizdiń qasıetti boryshtaryńyzdy adal atqaryp, týǵan jerimizdiń tynyshtyǵyn qorǵańyzdar, ózderińizdiń kásibı sheberlikterińizdi, jaýyngerlik daǵdylaryńyzdy arttyryp, jaýyngerlik baýyrlastyq pen birlikti nyǵaıtyńyzdar. Mereıtoılyq sherýdiń qazaqstandyq armııanyń áskerı qýatyn, joǵary rýhyn kórsetetindigine senimdimin», - dedi Elbasy.
Sonymen qatar Memleket basshysy áskerı qyzmetshilerdi batyr babalarymyzdyń erlik jolyn odan ary jalǵastyrýǵa shaqyryp, ekinshi dúnıejúzilik soǵys ardagerlerine rızashylyǵyn bildirdi.
«Bolashaq urpaq úshin Táýelsiz qýatty Qazaqstandy qurýǵa múmkinshilik jasaǵandaryńyz úshin barlyq ardagerlerge shynaıy rızashylyǵymdy bildiremin. Bizdiń elimizdiń Qarýly Kúshteri sizderdiń jaýyngerlik dańqtaryńyzdy jalǵastyrýshylar, ákelerimiz ben atalarymyzdyń erlik dástúrin jalǵastyrýshylardyń sımvoly. Otandy qorǵaý jáne onyń qaýipsizdigine qamqorlyq tanytý - elimizdiń árbir azamatynyń boryshy ári mindeti», - dedi Memleket basshysy.
