Qarýly kúshterdiń sýǵa súńgýshi sportshysy Eýropadan eki altyn, eki kúmis medalmen oraldy
ASTANA. QazAqparat - Qorǵanys mınıstrligi Sport komıteti Shtattyq komandalardy daıarlaý ortalyǵynyń nusqaýshysy efreıtor Shahnoza Qurbanova Eýropadan eki altyn jáne eki kúmis medalmen oraldy, dep habarlaıdy atalǵan vedomstvonyń baspasóz qyzmeti.
Qazaqstandyq sportshy Frantsııa, Germanııa jáne Chehııada ótken birneshe jarystarǵa qatysty.
Súńgýden halyqaralyq dárejedegi sport sheberi, efreıtor Shahnoza Qurbanova Germanııadaǵy Eýropa kýbogynda karta boıynsha baǵdarlaýda chempıon atandy. Munda 200 metrlik estafetada armııa sportshysynyń qatysýymen qazaqstandyq júzýshiler komandasy ekinshi orynǵa ıe boldy.
Chehııadaǵy Halyqaralyq týrnırde áıelder arasyndaǵy toptyq jattyǵýda Shahnoza Qurbanova sátti óner kórsetti. Qazaqstandyq júzýshiler tuǵyrdyń joǵary satysyna kóterildi.
Frantsııanyń ashyq chempıonatynda bizdiń júzýshi áıelder arasyndaǵy toptyq jattyǵýda kúmis júldeger atandy.
