Qarýly kúshterdiń sportshylary 30 ret Olımpıada oıyndarynyń jeńimpazy men júldegeri atanǵan
ASTANA. QazAqparat – Qazaqstan Qarýly kúshterinde sport kúni atalyp ótti, dep habarlaıdy QazAqparat mınıstrliktiń baspasóz qyzmetine silteme jasap.
Sportpen shuǵyldaný – áskerı qyzmetshilerdiń jaýyngerlik daıarlyǵynyń ajyramas bóligi. Ol adam boıynda kúshti, jyldamdyqty, tózimdilikti damytýǵa, jaýyngerge qajetti erik-jigerdi tárbıeleýge baǵyttalǵan.
QR Qorǵanys mınıstrliginiń Sport komıteti – Ortalyq sport klýby Qarýly kúshterdiń joǵary halyqaralyq dárejedegi sportshylaryn daıyndaıdy.
«Qazirgi kezde sport pen salaýatty ómir salty ekonomıkalyq damýmen qatar azamattardyń ómir súrý sapasynyń negizgi kórsetkishteriniń biri. Sport patrıotızm men jalpyulttyq birlik negizderin qalyptastyrýdaǵy mańyzdy aspekt. Áskerı sportshylar jankúıerlerin keremet oıyndarmen jáne rekordtarmen talaı ret qýantyp keledi. Sport ómiriniń ajyramas bóligine aınalǵan barlyq adamdardy quttyqtaımyn. Olarǵa zor densaýlyq, jaýyngerlik rýh jáne jańa jetistikter tileımin», – dedi Qorǵanys mınıstrliginiń Sport komıtetiniń tóraǵasy – Ortalyq sport klýbynyń bastyǵy podpolkovnık Arman Ábeýov.
Táýelsizdik jyldarynda Qarýly kúshterdiń sportshylary 30 ret Olımpıada oıyndarynyń jeńimpazdary men júldegerleri atandy, álemdik birinshilikterdiń 536 altyn, 359 kúmis jáne 421 qola medal, Eýropa men Azııa kontınenttik jarystarynyń 1800-den astam medal jeńip aldy. 2500-den astam ret TMD chempıondary atandy. 1992 jyldan bastap 10 myńnan astam áskerıler el chempıony ataǵyna ıe boldy.
Sport komıteti qyzmet barysynda Mádenıet jáne sport mınıstrligimen, Ulttyq Olımpıada komıtetimen, sport túrleri boıynsha Qazaqstan federatsııalarymen jáne basqa da qoǵamdyq sport birlestikterimen tyǵyz baılanysta. TMD jáne alys shet elderdiń halyqaralyq sport uıymdarymen jańa iskerlik baılanystar ornatý boıynsha turaqty jumys júrgizedi.
200-den astam áskerı sportshy ártúrli sport túrlerinen Qazaqstan qurama komandalarynyń múshesi, sondaı-aq Olımpıada oıyndaryna belsendi daıyndyq júrgizedi. 2019 jyly Qytaıdyń Ýhan qalasynda dúnıejúzilik áskerı oıyndar ótti. Atalǵan saıysqa 109 elden 9,3 myńnan astam sportshy qatysty. Medaldar esebiniń kestesine sáıkes Qazaqstan Qarýly kúshteriniń quramasy jalpy komandalyq esepte 12-orynǵa ıe boldy.
Olımpıada oıyndarynyń tarıhynda altyn áriptermen jazylǵan basketboldan ataqty armııa chempıondary – Áljan Jurmuhamedov (Mıýnhen q., 1972 j.) jáne Valerıı Tıhonenko (Seýl q., 1988 j.), aýyr atletshi Anatolıı Hrapatoı (Seýl q., 1988 j.), shańǵyshy Vladımır Smırnov (Lıllehammer q., 1994 j.), boksshylar Vasılıı Jırov (Atlanta q., 1996 j.), Ermahan Ibraımov (Sıdneı q., 2000 j.), Serik Sápıev (London q., 2012 j.) jáne jeńil atletshi Olga Shıshıgına (Sıdneı q., 2000 j.) men Olga Rypakova (London q., 2012 j.).
