Qarýly kúshterdiń medıtsınalyq mekemeleri 22 áskerı dárigermen tolyqpaq
Keńes Odaǵynyń eki márte batyry Talǵat Bıgeldınov atyndaǵy Áýe qorǵanysy kúshteri áskerı ınstıtýtynda ınternatýra baǵdarlamasy boıynsha bilim alǵan áskerı dárigerlerge dıplom tapsyrý rásimi saltanatty jaǵdaıda ótti. Bul – 2016 jyly áskerı ushqyshtar ınstıtýty bazasynda qurylǵan fakýltettiń ekinshi shyǵarylymy.
Medıtsına qyzmetiniń 22 jas ofıtseri jalpy praktıka dárigeri, hırýrg jáne terapevt biliktiligi týraly dıplomdar men kýálikter aldy. Jaqyn arada olar Qarýly kúshterdiń medıtsınalyq mekemelerine barady.
Medıtsına qyzmetiniń leıtenanttary M. Ospanov atyndaǵy Batys Qazaqstan medıtsına ýnıversıteti ınternatýrasynyń úlgilik kásiptik oqý baǵdarlamasy boıynsha Aqtóbe qalasyndaǵy medıtsınalyq mekemelerde klınıkalyq tájirıbe men oqýdan ótti.
«Áskerı dáriger bolý – zor mártebe ári jaýapkershilik. Patsıentterdiń ómiri men densaýlyǵy úshin kúreste sender dárigerdiń etıkalyq qaǵıdalaryna ǵana emes, áskerı antqa da adal bolýlaryń kerek», - dep atap ótti Áýe qorǵanysy kúshteriniń bas qolbasshysy, avıatsııa general-maıory Dáýren Qosanov.
Áskerı jáne azamattyq dárigerler baǵdarlamasyndaǵy aıyrmashylyq týraly oqý oryn túlegi, medıtsına qyzmetiniń leıtenanty Maqsat Mámbetalıev aıtyp berdi.
«Negizgi medıtsınalyq pándermen qatar, áskerı dárigerler áskerı eńbek fızıologııasyn, ushý medıtsınasyn, akvalangty, áskerı toksıkologııany jáne basqalardy zerdeleıdi», - dep túsindirdi áskerı hırýrg.
Búgingi tańda Áýe qorǵanysy kúshteriniń áskerı ınstıtýty janynda bastaýysh akademııalyq baǵdarlama boıynsha 38 medıtsınalyq kýrsant bilim alyp jatyr. Bıyl ınstıtýt 27 adamdy oqýǵa qabyldaýǵa daıyn.
