Qarýly Kúshterdiń qoımalary janynan tyıym salynatyn aımaqtar men aýdandardy belgileýge baǵyttalǵan zań qabyldandy - Parlament
ASTANA. 31 naýryz. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «QR keıbir zańnamalyq aktilerine Qarýly Kúshterdiń, basqa da áskerler men áskerı qurylymdardyń arsenaldary, bazalary men qoımalary janyndaǵy tyıym salynǵan aımaqtar men tyıym salynǵan aýdandar máselesi boıynsha tolyqtyrý engizý týraly» zań jobasy eki oqylymda maquldanyp, qabyldandy.
Atalǵan zań jobasynyń maqsaty Qarýly Kúshterdiń áskerı qurylymdarynyń arsenaldarynda, qoımalarynda saqtalatyn oq-dáriler men jarylǵysh zattardyń qaýipsizdigin qamtamasyz etý júıesin jetildirý bolyp tabylady. Osyǵan oraı zań jobasy men qoldanystaǵy zańnamalarǵa birqatar normalar engiziledi. «Birinshiden, Qarýly kúshterdiń qoımalarynda saqtaýda turǵan oq-dáriler men jarylǵysh zattardyń qaýipsizdigin jáne saqtalýyn qamtamasyz etý kózdelip otyr. Ekinshiden, qarý-jaraq saqtaý nysandarynda jáne olar janasatyn aýmaqtarda turatyn turǵyndardyń qaýipsizdigin qamtamasyz etý sharalaryn, sondaı-aq qarý-jaraq saqtaý nysandarynyń aýmaqtaryna dıversııaǵa qarsy jáne órtke qarsy is-sharalardy júrgizý úshin qolaıly jaǵdaılar jasaý kózdeledi»,- dedi zań jobasy boıynsha baıandaǵan Qorǵanys mınıstriniń orynbasary Talǵat Janjúmenov.
Budan bólek Úkimetke Qarýly Kúshterdiń qoımalary janyndaǵy tyıym salynǵan aımaqtar men tyıym salynǵan aýdandardy belgileý ókilettigi beriledi. Al, tyıym salynǵan aýmaqtardaǵy belgili shekteýlerdi buzǵany úshin ákimshilik jaýapkershilikter qarastyrylyp, aıyppuldar salý da kózdelip otyr. «Bul rette, laýazymdy adamdar tyıym salynǵan aımaqtar aýmaǵynda jeke tulǵalardyń qozǵalysy men turǵylyqty jerlerdi tańdaý erkindikteri quqyqtaryn shektegeni úshin ákimshilik jaýapkershilikten bosatylady. Ekinshiden, tyıym salynǵan aýmaqtaǵy shekteýlerdi buzǵany úshin jaýapkershilik kózdeledi», - dedi T. Janjúmenov. Onyń aıtýynsha, zań jobasyn ázirleý barysynda qorǵanys salasynyń mamandary jergilikti atqarýshy bılikpen birlese otyryp, jergilikti jerlerge aldyn ala barlaý júrgizgen. Sonyń barysynda boljamdy tyıym salynatyn aımaqtar aýmaǵynda, ıaǵnı saqtaý nysany aýmaǵynan syrtqy shekarasy 400 metr qashyqtyqta jer ýchaskesinde jeke tulǵalardyń turmaıtyny, óndiristik, áleýmettik-turmystyq maqsattaǵy nysandardyń ornalaspaǵandyǵy, soǵan baılanysty olardy kóshirý talap etilmeıtini anyqtalǵan.
Parlament qabyldaǵan zań Memleket basshysynyń qol qoıýyna jiberiledi.
