Qarýly kúshterde jyldyń úzdik áskerı qyzmetshileri marapattaldy
Aıta keterligi, Táýelsizdik kúni qarsańynda Prezıdent Jarlyǵymen Qarýly kúshterde barlyǵy 45 áskerı qyzmetshi nagradtaldy. Áskerı-teńiz kúshteriniń bas qolbasshysy kontr-admıral Sáken Bekjanov ІІ-shi dárejeli «Dańq» ordenimen, avıabaza komandıriniń orynbasary podpolkovnık Ivan Gavrılko ІІ-shi dárejeli «Aıbyn» ordenimen marapattaldy.
«Elbasynyń strategııalyq sheberliginiń, kóregendi de syńdarly saıasaty men parasattylyǵynyń arqasynda Qazaqstan óńirdegi eń turaqty el bolyp qalyptasty. Qazaqstan Respýblıkasynyń Prezıdenti – Qarýly Kúshterdiń Joǵarǵy Bas Qolbasshysy Qasym-Jomart Kemeluly Toqaevtyń basshylyǵymen elimizdiń qorǵanys qabileti udaıy nyǵaıýda», - dedi Qorǵanys mınıstri Nurlan Ermekbaev saltanatty jıynda.
Jıynda kózge túsken áskerı qyzmetshilerge memlekettik nagrada tabys etildi. Joǵary kórsetkishi men úlgili qyzmeti úshin mınıstrdiń buıryǵymen 14 ofıtserge merziminen tys áskerı ataq berildi.
2019 jyldan beri ótkizilip kele jatqan «Ásker tarlany» konkýrsynyń qorytyndysy shyǵaryldy.
Atalǵan konkýrstyń qorytyndysy boıynsha 24 úzdik áskerı qyzmetshige estelik músin, dıplom men aqshalaı syılyq tabys etildi.
Qorǵanys vedomstvosynyń basshysy Qarýly kúshterdiń 2020 jylǵy nátıjesin atap ótti. Armııa koronavırýs pandemııasyna qarsy is-sharalarǵa belsendi qatysty, ári qarqyndy damýyn jalǵastyrýda.
Áýe shabýylyna qarsy qorǵanystyń, radıoelektrondyq kúrestiń, áskerı-kólik avıatsııasynyń qazirgi zamanǵy quraldarymen jaraqtandyrý iske asyrylyp jatyr. Áskerge jańa qarý-jaraq kelip túsýde, qoldanystaǵy áskerı tehnıka jóndeledi jáne jańartylady.
Qazirgi qarýly qaqtyǵystardyń tájirıbesin zerdeleý negizinde áskerlerdi daıarlaý jetildiriledi. Arnaıy operatsııalar kúshterin damytý máseleleri basty nazarda. Oqytý baǵdarlamasyna armııalyq taktıkalyq atys engizildi, armııalyq qoıan-qoltyq urys boıynsha sabaqtarmen qamtý keńeıtildi.
Áskerı ǵylym men ratsıonalızatorlyq jumys jetildiriledi. Áskerı mamandar drondarǵa qarsy qarýdyń, pılotsyz ushý apparattarynyń, oqý trenajerlarynyń úlgilerin ázirledi.
Sybaılas jemqorlyqqa qarsy kúreste qoldanǵan júıeli sharalar bıýdjet qarajatyn iri kólemde qymqyrýǵa jol bermeýge, jemqorlyqpen quqyq buzýshylyqtar sanynyń jáne sol sebepti sottalǵan áskerı qyzmetshilerdiń yń azaıýyna múmkindik berdi.
Áskerı qyzmetshilerdi tárbıeleý protsesine olardyń tynys-tirshiliginiń barlyq salalaryn qamtıtyn sıtýatsııalyq keısteri bar 50 oqý modýli engizilgen.
Komandırdiń derbestigi men bastamasyn kótermeleý, áskerı qyzmetshilerdiń moraldyq-psıhologııalyq jaı-kúıin arttyrý boıynsha sharalar qabyldandy.
