Qarýly Kúshterde jańa oqý jyly bastaldy
«Osy kúni áskerı bólimderde jaýyngerlik ázirlik boıynsha sabaqtar ótkizilip, qarý-jaraq pen áskerı tehnıkaǵa qyzmet kórsetý, sondaı-aq, park-sharýashylyq kúnderi barysynda jumystardy oryndaý kezinde qaýipsizdik sharalaryn qatań saqtaý, jaýyngerlik eseptoptardy jetkizý boıynsha keshendi sabaqtar ótkizildi. Bul Qazaqstan Respýblıkasy Qarýly Kúshteriniń áskerı basqarý organdarynyń, áskerı bólimderi men mekemeleriniń jeke quramyn joǵary jaýyngerlik ázirlikke keltirý jumysyn úılestirý men jeke quramnyń is-qımyldardaǵy tájirıbelik daǵdylaryn jetildiretin bolady», - delingen atalǵan vedomstvo baspasóz qyzmetiniń málimetinde.
«Kásipqoı maman - armııa negizi» degen jaýyngerlik uranmen ótetin bıylǵy jyldyń ereksheligi - oqý jyly burnaǵy jyldardaǵydaı qysqy jáne jazǵy bolyp ekige bólinbeıdi. Qańtar aıynda jalaýyn kótergen jaýyngerlik oqý jyly qazan aıynyń aıaǵynda márege jetedi. Sonymen qatar, Qarýly Kúshterdegi derbes quramalar jańa baǵdarlamany meńgeretin bolady. «Shyǵys», «Ońtústik» óńirlik qolbasshylyǵy áskerleriniń jáne Aeroutqyr áskerleriniń qolbasshylarynyń basshylyǵymen bıylǵy jyly bes birdeı brıgadalyq oqý-jattyǵýlary ótkiziledi.
Tamyz aıynda Qazaqstan Respýblıkasynyń aýmaǵynda Ujymdyq qaýipsizdik sharty týraly uıymy jedel den qoıý kúshteriniń «Ózara is-qımyl - 2014» halyqaralyq oqý-jattyǵýlary ótkiziletin bolady. Oǵan uıymǵa múshe bes memleket - Qazaqstan, Reseı, Tájikstan, Armenııa, Belarýs jáne Qyrǵyzstannyń qarýly kúshteriniń jeke quramdary qatysady. Sondaı-aq, aldaǵy qyrkúıek aıynda qazaq jerinde keń kólemdi «Taza aspan-2014» sııaqty basqa da oqý-jattyǵýlardy ótkizý josparda bar.