Qarýly Kúshterde «Áskerı barlaý úzdikteri» baıqaýyna irikteý júrip jatyr

ASTANA. QazAqparat - «Batys» óńirlik qolbasshylyǵynyń «Qarabatan» oqý-jattyǵý polıgonynda Armııalyq halyqaralyq oıyndar - 2019 baǵdarlamasyna kiretin «Áskerı barlaý úzdikteri» baıqaýynyń irikteý kezeńi ótýde. Bul týraly QR Qorǵanys mınıstrligi málim etti, dep habarlaıdy QazAqparat tilshisi.

«Іrikteý kezeńinde óńirlik qolbasshylyqtyń namysyn qorǵaý úshin Aqtaý, Atyraý jáne Aqtóbe garnızondarynan 12 áskerı qyzmetshiden 4 komanda tartysqa túsedi. Komanda quramyna top komandıri, saper, mergen, sanıtar, oqshasharshy, atqysh, granataatqysh, baılanysshy, sondaı-aq rezervtegi 2 áskerı qyzmetshi kiredi. Saıys barysynda barlaýshylarǵa 5 shaqyrymdyq júgirý oryndaýǵa, «Barlaýshynyń soqpaq joly» kedergiler kesheninen ótýge, JÁJM júrgizý mashyqtaryn pash etýge jáne ártúrli kirispe mindetterdi pysyqtaýǵa, onyń ishinde, shartty qarsylasqa torýyl uıymdastyrýǵa týra keledi», - dep atap ótti mınıstrlikten.

Aıta keteıik, barlyq kedergilerdi áskerı qyzmetshiler tolyq kıim-keshekte eńserýleri tıis. Onyń salmaǵy - shamamen 25 kg. Bul qarý-jaraq, mına-jarylǵysh jáne ınjenerlik quraldar, kıim jáne medıtsınalyq múlik, sondaı-aq bir táýliktik qurǵaq azyq. Bıyl «Áskerı barlaý úzdikteri» halyqaralyq baıqaýy Úndistannyń Djaısalmer qalasynda ótedi.