Qarýly kúshterde 2017 jylǵa arnalǵan jaýyngerlik daıarlyqtyń baǵyttary belgilendi
2017 oqý jylynda áskerı qyzmetshilerdiń jaýyngerlik daıarlyǵyndaǵy negizgi kúsh-jiger áskerlerdiń jaýyngerlik qabilettiliginiń joǵary deńgeıin ustap turýǵa, jaýyngerlik daıarlyq sabaqtaryn uıymdastyrý men ótkizý sapasyn arttyrýǵa baǵyttalatyn bolady. Aldaǵy oqý jyly jeke quramdy oqytyp-úıretý boıynsha praktıkalyq sabaqtarǵa toly bolady. Onda negizgi nazar taktıkalyq býyndy daıyndaýǵa aýdarylady. Sonymen birge, jaýyngerlik is-qımyldardy uıymdastyrý jáne zamanaýı avtomattandyrylǵan basqarý jáne baılanys júıelerin qoldana otyryp, áskerlerdi basqarý boıynsha áskerı basqarý organdarynyń jumys jasaý ádisterin jetildirý jalǵastyrylady. Jeke quramnyń, qarý-jaraq pen áskerı tehnıkanyń qaıta ornalasýy máselelerin pysyqtaı otyryp, elimizdiń aýmaǵynda jáne halyqaralyq ekijaqty jáne túraralyq oqý-jattyǵýlarǵa Qazaqstan Qarýly Kúshteri áskerı qyzmetshileriniń qatysýy men ótkizilýi tájirıbesi jalǵasýda.
Bir jyl boıy áskerler «Qabylan joly - 2017», «Dala qyrany - 2017», «Jaýyngerlik baýyrlastyq - 2017», «Myzǵymas baýyrlastyq - 2017», «Jaýyngerlik dostastyq - 2017», «Túlki aýlaý - 2017» ispetti birqatar aýqymdy halyqaralyq lańkestikke qarsy jáne bitimgershilik oqý-jattyǵýlarǵa, onyń ishinde, UQShU-nyń jedel den qoıý Ujymdyq kúshteri áskerı kontıngentteriniń quramyndaǵy «Ózara is-qımyl - 2017», sondaı-aq, ShYU múshe memleketteri Qarýly Kúshteriniń «Beıbit mıssııa - 2017» oqý-jattyǵýyna qatysady.
Aýqymdy birlesken praktıkalyq jattyǵýlardyń ótkiziletin orny Qazaqstan, Reseı, Armenııa jáne Qytaıdyń áskreı polıgondary bolmaq. Áskerlerdiń jedel daıarlyǵy sheńberinde jaýyngerlik ázirlik boıynsha sabaqtar, Qarýly Kúshter túrleri, tekteri jáne Qarýly Kúshter óńirlik qolbasshylyqtary basqarý organdarynyń komandalyq-shtabtyq áskerı oıyndarǵa, sonymen qatar, «Qarataý - 2017» jedel-strategııalyq oqý-jattyǵýǵa qatysýy josparlanǵan. Jaýyngerlik daıarlyqta jeke quramnyń atys, dene, arnaıy jáne memlekettik-quqyqtyq daıyndyǵyn jetildirý jalǵasyn tabady.
2017 jyly jumyldyrý daıarlyǵy jaýyngerlik ázirliktiń joǵary dárejesine keltirý boıynsha jattyqtyrýlardy qamtıtyn bolady. Aldaǵy jyldyń mańyzdy oqıǵalarynyń biri elimizdiń Qarýly Kúshteriniń 25 jyldyǵyna oraı Áskerı paradtyń ótkizilýi, sondaı-aq, shildeniń 29-y men tamyzdyń 12-i aralyǵynda josparlanǵan Armııa halyqaralyq oıyndary - 2017 aıasynda áskerı qyzmetshilerdiń jaýyngerlik oqýynyń saıysqa túsý pishiminiń tájirıbesin jalǵastyrý jáne sapaly turǵyda keńeıtý bolmaq.
Alda bolatyn armııa oıyndarynyń baǵdarlamasyna 27 baıqaý engiziledi. Onyń 4-eýi pishimi men qatysýshylary boıynsha tyń jańa. Bul ÁAI ınspektorlary arasyndaǵy «Jol patrýli», «UUA ekıpajdarynyń saıystary», TMD qatysýshy memleketteriniń áskerı qyzmetshileriniń áskerı-kásibı sheberliginiń «Dostastyq jaýyngeri» baıqaýy jáne áskerı polıtsııa áskerı qyzmetshileri arasyndaǵy «Tártip saqshysy» saıysy. «Mergen shebi», «Artıllerııalyq oq atý sheberleri», jáne «UUA ekıpajdarynyń saıysy» atty úsh halyqaralyq baıqaý Qazaqstan aýmaǵynda ótetini este qalarlyq bolady.
Jaýyngerlik daıarlyqtyń jekelegen tapsyrmalary QR QK árbir ásker túriniń aldynda turǵanyn aıta ketken jón.
Qurlyq áskerlerinde zamanaýı soǵys pen qarýly shıelenisterdiń sıpatyna sáıkes áskerı bólimder men quramalardyń jaýyngerlik jáne jumyldyrý ázirligin arttyrý boıynsha jumys óz jalǵasyn tabady.
Áýe qorǵanysy kúshterinde jaýyngerlik ázirliktiń joǵary deńgeıin ustap turýǵa, kásipqoılyqty arttyrýǵa, kúndiz jáne túnde qarapaıym jáne kúrdeli meteojaǵdaılarda pılotajdaý tehnıkasynyń ushý quramyn jetildirýge nazar aýdarylady.
Áskerı-teńiz kúshterinde korablderdiń jaýyngerlik kezekshiligin, joǵary turǵan áskerı basqarý organdarymen ózara is-qımyldy uıymdastyrý jónindegi jumysty jalǵastyrý.
Ótken oqý jylynda Qarýly Kúshter quramalary men áskerı bólimderiniń jeke quramy dalalyq, ushý jáne teńiz daǵdysyn shyńdaı otyryp, kásibı sheberliktiń ósýiniń oń dınamıkasyn kórsetkenin aıta ketken jón. Áskerı qyzmetshiler josparly jaýyngerlik oqý, onyń ishinde, sarbazdyń, kelisimshart boıynsha áskerı qyzmetshi men sardardyń jeke daıyndyǵynda, bilimdi arttyrý men shtattyq qarý jáne tehnıkany meńgerý sheberliginde belgili bir jetistikterge qol jetkizdi. Bul rette 2016 jyly jaýyngerlik daıarlyqtyń mańyzdy oqıǵalary jedel-taktıkalyq, taktıkalyq-arnaıy jáne «Aıbalta - 2016», «Qarataý - 2016», «Ózara is-qımyl - 2016», «Myzǵymas baýyrlastyq - 2016», «Kembrııalyq patrýl» jáne jastardyń «Aıbyn» áskerı-patrıottyq forýmynyń ótkizilýi boldy. Qazaqstandyq áskerı qyzmetshilerdiń «Dostastyq jaýyngeri» men «Altyn úki» saıystaryna, sondaı-aq, Armııa halyqaralyq oıyndarynyń 21 konkýrsyna, onyń ekeýi alǵash ret Qazaqstannyń «Mátibulaq» áskerı bazasynda oıdaǵydaı ótkenin aıta ketken abzal. 2017 oqý jyly «Qarýly Kúshterdiń 25 jyldyǵyna - joǵary jaýyngerlik ázirlik!» uranymen ótetin bolady.
