Qarýly Kúshterde 12 myńnan astam adam koronovırýsqa qarsy vaktsınalandy
Búgin Qorǵanys mınıstrliginde ótken apparat keńesinde el áskeriniń tynys-tirshiligine qatysty ózekti máseleler qaraldy.
Keńeste, «Qalqan-2021» jedel-taktıkalyq oqý-jattyǵýynyń qorytyndylary baıandalyp, onda Qarýly Kúshterdiń, Shekara qyzmetiniń jáne Ulttyq ulannyń memlekettik shekarany kúsheıtý jónindegi birlesken praktıkalyq is-qımyldary alǵash ret pysyqtalǵan bolatyn.
Qorǵanys mınıstri Nurlan Ermekbaev bul rette, oqý-jattyǵý nátıjelerin taldaý negizinde áskerlerdi jaýyngerlik jáne jedel daıarlaý úrdisine manevrler barysynda tıimdilik kórsetken tájirıbeni engizýge nusqaý berdi.
Qysqy oqý kezeńiniń aıaqtalýyna baılanysty polıgondar men oqý alańdaryn oq-dáriler qaldyqtarynan tazartý bas qolbasshylarǵa, qolbasshylarǵa tapsyryldy. Budan ózge, qarý-jaraq pen áskerı tehnıkany jazǵy paıdalaný rejımine aýystyrýdy ýaqtyly oryndaý qajettigi jáne bul is-sharalar jazǵy oqý kezeńine qaraı aıaqtalýy tıistigi aıtyldy.
Áskerge shaqyrý naýqanyn jalǵastyrý barysynda sondaı-aq, barlyq sanıtarlyq-epıdemıologııalyq sharalardyń saqtalýyna nazar aýdaryldy. Bul sharalar áskerge baratyndardy irikteıtin jergilikti áskerı basqarý organdaryna da, jas sarbazdar kelgen soń karantındik is-sharalar júzege asyrylýy tıis áskerı bólimderge de qatysty.
Sondaı-aq Bas áskerı medıtsınalyq basqarmanyń bastyǵy jeke quramǵa júrgizilgen ekpe jóninde jetkizdi. 19 sáýirdegi jaǵdaı boıynsha 12 myńnan astam áskerı qyzmetshi men Qarýly Kúshterdiń azamattyq personal ókilderi koronavırýsqa qarsy ekpe saldyrdy.
