Qarýly kúshter - el qaýipsizdiginiń kepili

ASTANA. QazAqparat - Otan qorǵaýshylar kúni men Qazaqstan Qarýly kúshteriniń 25 jyldyǵyna oraı Qazaqstan etek-jeńin jınap, óz aldyna el bolǵaly eń iri áskerı sherý ótkizdi. Elorda tórindegi «Qazaq Eli» alańynda ótken paradta 5 myńnan astam áskerı qyzmetshi, 300 áskerı tehnıka men 70 áskerı avıatsııa ushaǵy Qarýly kúshterimizdiń jetistigin kúlli álemge tanystyrdy. Bas qolbasshy Nursultan Nazarbaev qatysqan sherýde «Romb» jaýyngerlik tártibinde sap túzegen «Jetisý» pılottyq toby SÝ-27 joıǵysh ushaqtarymen Astana aspanynda «Báıterek» atty joǵary pılotaj beınesin jasady.

1992 jyly 7 mamyrda Qazaqstan Prezıdenti, Qazaqstan Respýblıkasynyń Joǵarǵy Bas qolbasshysy N.Á. Nazarbaev «Qazaqstan Respýblıkasy Memlekettik qorǵanys komıtetin Qazaqstan Respýblıkasynyń Qorǵanys mınıstrligi etip qaıta qurý týraly», «Qazaqstan Respýblıkasynyń Qarýly Kúshterin qurý týraly» jáne alǵashqy qorǵanys mınıstri etip general polkovnık S.Q. Nurmaǵambetovty taǵaıyndaý týraly jarlyqtarǵa qol qoıdy. Bul kún Qazaqstannyń derbes Qarýly Kúshteriniń qurylǵan kúni bolyp qaldy.

Osynaý shırek ǵasyrda Qazaqstan Qarýly kúshteriniń jańa beınesi qalyptasty. Sany az bolsa da, kásibı biliktiligi joǵary, jınaqy, zamandyq qarý-jaraqpen, jańa áskerı tehnıkalarmen jaraqtandyrylǵan armııa quryldy.

Dál sol kúni qos merekeniń qurmetine Almatyda da saltanatty shara ótti. Dástúr boıynsha 28 gvardııashy-panfılovshylar saıabaǵynda ótken sharaǵa Uly Otan soǵysynyń ardagerleri, áskerı qyzmetkerler, kýrsanttar, bolashaq jaýyngerler jınaldy.

Jıynda qala ákimi Baýyrjan Baıbek quttyqtaý sóz aıtyp, Qazaqstan armııasynyń jyl sanap qýaty arta túskenin, onyń jańa áskerı qarýlarmen jáne áskerı tehnıkamen qamtamasyz etilgenin, áskerı kadrlar biliktiliginiń artqandyǵyn, olardyń áleýmettik máseleleriniń sheshilip jatqanyn erekshe atap ótti.

- Biz osydan 25 jyl buryn Almatyda memleket basshysy Nursultan Nazarbaev QR Qarýly kúshterin qurý týraly Jarlyqqa qol qoıǵanyn jáne áskerılerimizdi maqtan etemiz. Men erlikteri ǵasyrlarǵa jalǵasatyn ardagerlerimizge aıryqsha alǵys aıtamyn. Bizdiń jastarymyz 20-ǵa tolmaǵan atalarymyz ben ákelerimizdiń týǵan jerin jaýdan qorǵaý úshin maıdanǵa attanǵanyn únemi esterinde saqtaýlary tıis. Ómirge qushtar órim jastar kezinde dáriger, muǵalim, ǵalym bolýdy, otbasyn qurýdy armandaǵan edi. Ókinishke oraı, olardyń basym kópshiligi maıdannan qaıtpady, armandary orta jolda úzildi. Mine, biz Otany úshin janyn qıǵandardyń arqasynda zor jetistikterge jetken uly elde ómir súrýdemiz, - dedi Baýyrjan Baıbek.

Sonymen qatar, Almaty qalasynyń Qorǵanys isteri jónindegi departamentiniń basshysy, general-maıor Nıkolaı Qýatov elimizdiń Qorǵanys kúshteriniń qysqa merzim ishinde orasan joldan ótip, nyq qadam basqanyn, memlekettiń birtutastyǵy men qaýipsizdiginiń ómirsheń ınstıtýtyna aınalǵandyǵyn aıtty.

Saltanatty sharada desantshylar ózderiniń sheberlikterin kórsetse, QR Memlekettik úrmeli aspaptar orkestriniń defılesi kópshiliktiń kóńilinen shyqty. Sońynda jınalǵan jurtshylyqqa Astananyń «Qazaq eli» alańynda ótip jatqan el tarıhyndaǵy eń aýqymdy áskerı sherýden tikeleı vıdeo-translıatsııa kórsetildi.

Jeńis kúniniń 72 jyldyǵy, Otan qorǵaýshylar kúni men QR Qorǵanys kúshteriniń 25 jyldyǵyna arnalǵan aýqymdy sharalar Almatynyń 8 aýdanynda da atap ótildi. Oǵan eńbektegen baladan eńkeıgen qartqa deıingilerdiń bári jınalyp, merekeniń mánin asha tústi.