Qarýly kúshter ardagerleri áskerge shaqyrý tártibin jaqsartýdy usyndy
Muhtar Altynbaev, Talǵat Musabaev, Baqytjan Ertaev, Ratmır Komratov, Marat Naǵumanov jáne Qarýly kúshterdiń basqa da ardagerleri qatysqan kezdesýde Prezıdent Joldaýynyń negizgi baǵyttaryna nazar aýdaryldy.
Mınıstr Memleket basshysynyń tapsyrmalaryn iske asyrý jaqyn arada qazaqstandyqtardyń ál-aýqaty men ómir súrý sapasyn arttyrýdyń kepili bolatynyn atap ótti. Sondaı-aq, Qarýly kúshterdi keshendi jáne júıeli jetildirýdi qamtamasyz etý, bólimshelerdiń jaýyngerlik ázirligi men qabiletin arttyrý, áskerı ınfraqurylymdy jańartý men vedomstvoaralyq úılestirýdi kúsheıtý maqsatynda qabyldanyp jatqan sharalar týraly habardar etti.
Kezdesý barysynda áskerge shaqyrylýǵa deıingi jastardy áskerı-patrıottyq baǵytta tárbıeleý, azamattardy merzimdi áskerı qyzmetke shaqyrý, áskerı oqý oryndaryna úmitkerlerdi qabyldaý máseleleri qozǵaldy.
Qorǵanys mınıstri ardagerlerge jastardy áskerı-patrıottyq tárbıeleý isine qosqan úlesi úshin rızashylyǵyn bildirip, urpaqtar sabaqtastyǵyn saqtaýdyń mańyzdylyǵyn atap ótti. Sondaı-aq, bul yntymaqtastyqtyń sapaly, jańa deńgeıge shyǵatynyna senim bildirdi.
Ardagerler qazirgi zamanǵy talaptardy eskere otyryp, áskerlerdiń jaýyngerlik daıarlyǵyna jańa tásilderdi engizý turǵysynan armııada bolyp jatqan ózgeristerdi atap ótip, áskerge shaqyrý tártibin jaqsartý jáne jeke quramdy patrıottyq rýhta tárbıeleý jóninde usynystaryn aıtty. Qarýly kúshterdiń ardagerlerin aqparattyq-túsindirý toptarynyń jumysyna belsendi qatystyrý týraly bastama da kóterildi.
Aıta ketsek, qorǵanys vedomstvosy shaqyrý ýchaskelerine tirkeý týraly kýálikterden bas tartýdy, sondaı-aq áskerı qyzmet ótkermegen azamattarǵa áskerı bılet berýdi alyp tastaýdy usynǵan bolatyn.
