Qarýly Kúshterimizdi jańǵyrtyp jatyrmyz — Prezıdent

ASTANA. KAZINFORM — Armııanyń kúsh-qýaty jaýyngerlik rýh pen temirdeı tártipke tikeleı baılanysty. Memleket basshysy Qasym-Jomart Toqaev elordanyń Táýelsizdik alańynda ótip jatqan áskerı paradta  osyndaı paıym aıtty.

— Elimizdiń qorǵanys qabiletin arttyrý — asa mańyzdy mindet. Biz Qarýly Kúshterimizdi jańǵyrta bastadyq, armııamyzdy kúsheıtý úshin naqty jumys júrgizip jatyrmyz. Osy óte mańyzdy másele boıynsha Parlament zań qabyldady. Memleket áskerı qyzmetshilerge, arnaýly mekemeler men azamattyq qorǵanys salasynyń qyzmetkerlerine árdaıym qoldaý kórsetedi. Armııamyzdyń kúsh-qýaty jaýyngerlik rýh pen temirdeı tártipke tikeleı baılanysty, — degen Memleket basshysy áskerılerdiń minsiz qyzmeti eldegi qaýipsizdik pen tynyshtyq kepili ekenin eske saldy.

Toqaevtyń sózinshe, ár azamattyń boıynda Otanǵa degen adaldyq pen ádildik bolýy tıis.

— Biz ozyq oıly ult retinde zań men tártipti bárinen bıik qoıatyn boldyq. Ár azamattyń boıynda Otanǵa degen adaldyq pen ádildik bolýǵa tıis, — dedi Qasym-Jomart Toqaev.

Sondaı-aq, Memleket basshysy Ádiletti Qazaqstandy qalyptastyrýda áskerı qyzmettiń mańyzy da zor ekenin atap ótti.

— El qorǵaý — abyroıly mindet jáne zor jaýapkershilik. Bul — ár azamattyń perzenttik paryzy. Sizdermen birge barsha azamatymyz Ádiletti, Qýatty, Qaýipsiz jáne Taza Qazaqstandy quryp jatyr. Osy tarıhı jumysymyz tabysty bolsyn! Rýhymyz myqty, memlekettiligimiz máńgi bolsyn! Kók Týymyz bıikte jelbiresin! Qadirli Otandastar! Uly Jeńistiń 80 jyldyǵy qutty bolsyn, — dedi Prezıdent.

Aıta ketý kerek, búgingi áskerı sherýge 4 myńnan astam áskerı qyzmetshi, 200-den astam áskerı tehnıka, 66 ushý apparaty tartylǵan. 

Sondaı-aq, paradta bıyl satyp alǵan sý jańa Airbus A-400 áskerı-kólik ushaǵy alǵash ret qatysady. Armııalyq Mı-17, Mı-171Sh, Mı-35 jáne kóliktik S-295, Tý-154M, L-410 ushaqtary, Sý-30SM, Sý-25 joıyǵysh ushaqtary, L-39 oqý-jaýyngerlik ushaǵynyń ekıpajdary sherýdiń aıbynyna áýeden aıbyn qospaq.