Qarýly kúshterimizdi jáne áskerı mekemelerimizdi túbegeıli reformalaý kerek – Prezıdent
ASTANA. KAZINFORM - Prezıdent memlekettik marapat jáne áskerı shen tapsyrý rásiminde sóılegen sózinde qazirgi zamanǵy syn-qaterler men elimizdi osy baǵytta qandaı baǵytty ustanýy qajet degen másele tóńireginde oı qozǵady.
Prezıdent sózinde Qazaqstan – ótkenge zor qurmetpen, bolashaqqa úlken úmitpen qaraıtyn beıbit el ekenin atap ótti.
– Biz kez kelgen qaqtyǵys dıplomatııalyq jolmen, kelissózder arqyly sheshilýge tıis dep esepteımiz, árqashanda «as pen tas» strategııasyn júrgizýge daıyn bolýymyz qajet. Biz halyqaralyq quqyq qaǵıdattary men normalary qatań saqtalýy kerek dep sanaımyz. Qazaqstan álemniń barlyq elimen dostyq qarym-qatynasyn nyǵaıta beredi. Osy myzǵymas ustanymdar jańa Ata zańymyzda naqty aıqyndaldy. Biraq bul qamsyz otyrý qajet degen sóz emes. Elimiz túrli syn-qaterdiń aldyn alýǵa jáne kez kelgen qaýipke tótep berýge daıyn bolýǵa tıis. Sondyqtan memleketimizdiń qorǵanys qabiletin kúsheıtip, áskerimizdi eń birinshi kezekte tehnologııalyq turǵydan jańǵyrta berýimiz qajet. Bul – qazirgi turaqsyz, qubylmaly zamannyń talaby, sony eskere otyryp, eń aldymen, Qarýly kúshterimizdi jáne áskerı mekemelerimizdi túbegeıli reformalaý kerek. Bul – strategııalyq mańyzy zor mindet, ony sozbaı, eki jyl ishinde oryndaý qajet, – dedi Qasym-Jomart Toqaev.
Osyǵan deıin Memleket basshysy Qazaqstan armııasyn zaman talabyna saı nyǵaıtý sharalary qolǵa alynǵanyn aıtty.
