Qarýly kúshterdiń deni Qulsaryda qutqarý jumysyn júrgizip jatyr

ASTANA. KAZINFORM – Qorǵanys mınıstrliginiń resmı ókili Rýslan Jangýlın el aýmaǵyndaǵy sý tasqynymen kúreste Qarýly kúshterdiń jumysy týraly málim etti.

«Avıatsııanyń jeke quramymen 74 adam evakýatsııalandy, ıaǵnı tikushaqpen 7 jáne áskerı ushaqpen 2 reıs uıymdastyryldy. MI-8 tikushaǵynyń kómegimen 5 adam evakýatsııalandy. Memleket basshysynyń tapsyrmasy boıynsha sý basqan óńirlerge qarýly kúshterden qosymsha 300-ge tarta jeke quram jáne 32 áskerı tehnıka jumyldyrylyp otyr. Olardyń deni qazir Atyraý oblysynyń Qulsary qalasynda jumys istep jatyr. Basty maqsat – adamdardy sý apatynan qutqaryp, tasqynmen kúres jumystaryn uıymdastyrý», - dedi Rýslan Jangýlın OKQ-de ótken brıfıngide. 

Odan bólek, Qarýly kúshterdiń aýmaqtyq qorǵanys brıgadalary Qostanaı, SQO jáne BQO-da apattan qutqarý jumysyn júrgizýde. 

«Aqtóbe qalasyndaǵy áýe qorǵanysy kúshteri áskerı ınstıtýtynyń 167 jeke quramy Qarǵaly ózeni jaǵalaýynda qumdy qaptap, daıyndap jatyr. Odan bólek, keshe qarýly kúshterdiń Qonaev gornızonynan áskerı ınjenerler quramy Aqtóbe oblysynyń Oıyl aýmaǵyn keldi. Olar parom ótkelderi arqyly halyqty evakýtsııalaıdy, qazir ol jerden 150 azamat qaýipsiz aımaqqa jetkizildi. Sondaı-aq, jalpy sany 3 tonna gýmanıtarlyq kómek jiberildi», - deıdi ol. 

Qorǵanys mınıstrligi resmı ókiliniń málimetinshe, 27 naýryz ben 6 sáýir aralyǵynda Qarýly kúshterden 2 myńnan astam jeke quram qutqarý jumystaryna tartyldy. Sonymen qatar 105 birlik áskerı tehnıka, 15 tikushaq jáne 4 ushaq bar.