Qarýly kúshterdiń áskerı qyzmetshisi 600 shaqyrymdyq sýpermarafondy eńserdi
ASTANA. KAZINFORM — Astana qalasy aýmaqtyq qorǵanys brıgadasynyń bólimshe komandıri 3-synypty serjant Raýan Ábilhanov Astana – Kókshetaý – Astana baǵyty boıynsha jańa rekord ornatyp, kezekti 600 shaqyrymdyq sýpermarafondyq qashyqtyqty baǵyndyrdy. Bul týraly Qorǵanys mınıstrligi málim etti.
5 kún buryn elordanyń «Kóktal» saıabaǵynan marafondy bastaǵan áskerı qyzmetshi Qorǵanys mınıstrliginiń ǵımaraty aldynda márege jetti. Munda ony saltanatty jaǵdaıda qarsy aldy. Áskerı orkestr óner kórsetip, marafonshymen jáne onymen kún saıyn birge erip júrgen komandany baýyrsaqpen syılap, sap alańynda qýanysh pen maqtanysh sezimge toly erekshe atmosfera ornady.
Jeńimpazdy Qorǵanys mınıstrliginiń basshylyǵy men jeke quramy, qyzmettesteri men týǵan-týystary qarsy aldy. Qorǵanys mınıstriniń orynbasary general-leıtenant Qanysh Ábýbákirov 3-synypty serjant Raýan Ábilhanovtyń bul jetistigi áskerı qyzmetshilerdiń rýhyn kóterip, tabandylyǵy men patrıotızminiń jarqyn úlgisi bolǵanyn atap ótti.
– Sport pen armııa – egiz uǵym, – dedi ol. – 3-synypty serjant Raýan Ábilhanovtyń jeńisteri sportty nasıhattap, Qarýly kúshterdiń áskerı qyzmetshilerin jańa jetistikterge jeteleıdi.
Marafonshynyń ózi bul rekordqa jetý ońaı bolmaǵanyn moıyndady. Degenmen, Qorǵanys mınıstrligi basshylyǵynyń, komandırleriniń, jaqyndary men jerlesteriniń, sondaı-aq kóptegen qazaqstandyqtardyń qoldaýy oǵan úlken kúsh bergen. Aýa raıynyń kúrt nasharlaýyna qaramastan, ol kúnine 120 shaqyrym júgirip, óte aýyr qashyqtyqty eńsere aldy. Maqsatyna jetýge degen tabandylyǵy men turaqty jattyǵýlary 3-synypty serjant Raýan Ábilhanovqa qajetti qarqyndy saqtap, júgirýdi jalǵastyrýǵa múmkindik berdi.
Áskerı marafonshynyń aıtýynsha, bólim basshylyǵy oǵan daıyndyq úshin eki aı ýaqyt bergen. Ol kún saıyn 40 shaqyrymnan astam qashyqtyqty júgirip otyrǵan. Bul rekord Qazaqstan Respýblıkasynyń ulttyq merekesi – Respýblıka kúni qarsańynda burynǵy qazaqstandyq ýltramarafon rekordtaryn jańartty.
9 balanyń ákesi armııada 20 jyldan astam ýaqyt qyzmet etip keledi. 2022 jyly ol Almaty oblysyndaǵy «Álı» oqý ortalyǵy men Shelek aýyly arasyndaǵy 350 shaqyrymdyq qashyqtyqty 48 saǵatta júgirip ótip, Qazaqstan rekordtar kitabyna engen bolatyn. 42 jastaǵy Raýan Ábilhanovtyń otbasynda 8 qyz ben bir ul tárbıelenýde. Ol 15 jyldan astam ýaqyttan beri jeńil atletıkamen aınalysyp keledi jáne Almaty qalasy men Qarýly kúshter uıymdastyrǵan marafondardyń birneshe dúrkin jeńimpazy.
Astanalyq áskerı 3-synypty serjant Raýan Ábilhanov 600 shaqyrymdyq ýltramarafonǵa attanǵanyn jazǵan edik.