Qarýly kúshterdiń áskerı qyzmetshilerine memlekettik jáne vedomstvolyq nagradalar tabystaldy
ASTANA. KAZINFORM — Astanada QR Qorǵanys mınıstri Dáýren Qosanov Qarýly kúshterdiń jeke quramyn ulttyq mereke — Respýblıka kúnimen quttyqtap, erekshe kózge túsken áskerı qyzmetshilerge memlekettik jáne vedomstvolyq nagradalardy tabys etti. Bul týraly mınıstrliktiń baspasóz qyzmeti habarlady.
Qorǵanys vedomstvosynyń basshysy óz sózinde Qazaqstannyń táýelsizdigi jolynda memlekettiń egemendigi týraly deklaratsııany qabyldaýdyń tarıhı mańyzdylyǵyn atap ótti. Mınıstr ulttyq áskerdi qurýdyń bastaýynda turǵan ardagerlerge erekshe alǵys bildirdi.
— Sizderdiń Qarýly kúshterdiń qalyptasýy men damýyna qosqan úlesterińiz orasan zor. Baı tájirıbelerińizdiń, batyldyqtaryńyz ben áskerı qyzmetke adaldyqtaryńyzdyń arqasynda jas urpaqqa úlgi bolatyn jaýyngerlik daıyndyq pen patrıotızmniń berik irgetasy qalandy, — dep atap ótti Dáýren Qosanov.
Qorǵanys mınıstri qazaqstandyq áskerı qyzmetshilerdiń daıyndyǵy men kásibıliginiń deńgeıi joǵary dep atap ótip, bıylǵy jyly «Aıbalta», «Desant», «Jaýyngerlik dostastyq» iri oqý-jattyǵýlary, Uly Jeńistiń 80 jyldyǵyna arnalǵan áskerı sherý, odan bólek «Aıbyn» XI halyqaralyq áskerı-patrıottyq jastar jıyny sátti ótkizilgenin jetkizdi.
Mınıstr budan bólek qazaqstandyq áskerı qyzmetshilerdiń Golan jotalarynda BUU-nyń mıssııasy quramynda bitimgerlik mindetterdi laıyqty atqaryp júrgenine toqtaldy.
— Aýqymdy saıası, ekonomıkalyq jáne áleýmettik reformalar ahýalynda biz eldiń áskerı qaýipsizdigin jáne azamattardyń beıbit ómirin qamtamasyz etý úshin qoldan kelgenniń bárin jasaýymyz kerek, — dep atap ótti Qorǵanys mınıstri.
Rásim sońynda avıatsııa general-leıtenanty Dáýren Qosanov úzdik áskerı qyzmetshilerge memlekettik jáne vedomstvolyq nagradalar tabys etti.
Baýyrjan Momyshuly atyndaǵy II dárejeli «Aıbyn» ordenimen 50185 áskerı bóliminiń komandıri polkovnık Nurlan Bekbosynov jáne 12740 áskerı bóliminiń komandıri podpolkovnık Dáýlet Sekenov marapattaldy. Rahymjan Qoshqarbaev atyndaǵy III dárejeli «Aıbyn» ordenin desanttyq-shabýyldaý áskerleriniń shtab-serjanty Bek Núsipbaev aldy.
«Jaýyngerlik erligi úshin» medalimen maıor Erkebulan Kósherbaev, kapıtan Batyrbek Jamal jáne 3-synypty serjant Lınar Ájiman marapattaldy. «Eren eńbegi úshin» medali medıtsına qyzmetiniń podpolkovnıgi Láılá Tańatarovaǵa tabystaldy. Qyzmettegi jáne sporttaǵy joǵary nátıjeleri úshin maıor Vadım Fedoseev «El qorǵany» medalimen marapattaldy.
Qazaqstan Prezıdentiniń Jarlyǵymen barlyǵy 29 áskerı qyzmetshige memlekettik nagrada (7 orden jáne 22 medal) tabys etildi. Vedomstvolyq nagradamen 56 adam, onyń ishinde «Qazaqstan Respýblıkasy Qarýly Kúshteriniń úzdigi» tósbelgisimen 9 merzimdi qyzmet áskerı qyzmetshisi marapattaldy. Sonymen qatar 40 áskerı qyzmetshige merziminen buryn kezekti áskerı ataq berildi.
Aıta keteıik, Respýblıka kúni qarsańynda Prezıdent bir top azamatty memlekettik nagradamen marapattady.