Qarýly kúshterde jańa mamandyqtar men tsıfrlyq júıeler damıdy
ASTANA.KAZINFORM - Qorǵanys mınıstrliginiń bolashaq ofıtserleri men ártúrli deńgeıdegi komandırler daıarlaıtyn áskerı oqý oryndarynda jańa oqý jyly bastaldy, dep habarlaıdy QR Qorǵanys mınıstrliginiń baspasóz qyzmeti.
Bilim kúnine oraı Qazaqstan Respýblıkasy Qorǵanys mınıstriniń mindetin atqarýshy avıatsııa general-leıtenanty Dáýren Qosanov Qorǵanys mınıstrligi áskerı oqý oryndarynyń basshylyǵy jáne professorlyq-oqytýshylyq quramymen beınekonferentsııa ótkizdi.
Ol zamanaýı qarýly qaqtyǵystar tájirıbesine qaraı oqýdyń praktıkalyq baǵytyn kúsheıtýge nazar aýdardy.
– Daıarlyqtyń negizin praktıkalyq sabaqtar, qarý-jaraq pen áskerı tehnıkany qoldaný, komandalyq-shtabtyq jattyǵýlar jáne urys jaǵdaılaryn modeldeý quraýy tıis. Bizdiń mindetimiz – jańa býyn ofıtserin daıarlaý. Ol kásibı, tehnologııany jetik meńgergen, bastamashyl, jaǵdaıdy jedel baǵalap, negizgi sheshim qabyldaı alatyn jáne sol sheshimi úshin jaýap bere alatyn maman bolýy kerek, – dedi ol.
Avıatsııa general-leıtenanty Dáýren Qosanov áskerı bilim sapasy Qarýly kúshterdiń jaýyngerlik ázirligi men qabiletine tikeleı áser etetinin atap ótti.
– Tsıfrlandyrý jáne jasandy ıntellekt jylynda ushqyshsyz basqarylatyn júıeler, robototehnıka, tsıfrlyq tehnologııalar jáne avıatsııa salalaryndaǵy jańa mamandyqtar men daıarlaý baǵyttaryn qurýǵa jáne damytýǵa erekshe nazar aýdarý qajet, – dedi ol.
Áskerı bilim berýdi tsıfrlyq transformatsııalaý máselesine toqtalǵan Dáýren Qosanov jasandy ıntellekt tehnologııalaryn, tsıfrlyq platformalardy, elektrondyq trenajerlerdi, vırtýaldy zerthanalar men sımýlıatsııalyq tehnologııalardy oqý baǵdarlamasyna belsendi engizýdiń mańyzyn atap ótti.
Avıatsııa general-leıtenanty oqytýshylardyń qaǵazbastylyǵy men beıindi emes júktemesin azaıtý qajettigine de toqtaldy. Bul rette «Askeri Ziyat» aqparattyq júıesiniń biryńǵaı tsıfrlyq bilim berý ortasy retindegi róline nazar aýdardy.
– Tsıfrlandyrý oqytýshyny artyq júktemeden bosatyp qana qoımaı, bilim berý sapasyn arttyrýy tıis. Jasandy ıntellektini akademııalyq adaldyqty saqtaı otyryp, aqparattyq qaýipsizdikti qamtamasyz etý, eń bastysy, qabyldanǵan sheshim úshin adamnyń jaýapkershiligin saqtaı otyryp, saýatty ári jaýapkershilikpen paıdalaný mańyzdy, – dedi ol.
Áskerı oqý oryndarynyń ǵylymı áleýetin nyǵaıtý maqsatynda vedomstvo basshysynyń mindetin atqarýshy perspektıvaly ǵylymı zertteýler áskerlerdiń naqty qajettilikterine saı bolýy, praktıkada qoldanylýy jáne tıisti synaqtardan keıin Qarýly kúshterdiń qyzmetine engizilýi kerektigin atap ótti.
Basym baǵyttardyń biri retinde bolashaq ofıtserlerdi tárbıeleý, áskerı tártipti nyǵaıtý jáne kandıdattardy irikteý sapasyn arttyrý tapsyrmalary belgilendi. Buǵan qosa jaýapkershilik, ózin-ózi tárbıeleý, kóshbasshylyq qasıetter men áskerı mindetti adal oryndaýǵa daıyndyqty qalyptastyrýǵa erekshe mán beriledi.
Keńes sońynda áskerı oqý oryndarynyń basshylyǵy men professorlyq-oqytýshylyq quramǵa jańa oqý jylyna arnalǵan naqty tapsyrmalar berildi.
Osyǵan deıin Qarýly kúshter tarıhynda tuńǵysh ret kıberqaýipsizdik ofıtserleri túlep ushqany týraly jazdyq.
