Qarýly Kúshterde ushqyshsyz júıeler men jasandy ıntellekt oqytylady
ASTANA. KAZINFORM – Qazaqstan Qarýly Kúshterinde SARBAZ+ jobasy aıasynda drondar, tsıfrlyq tehnologııalar jáne jasandy ıntellekt baǵyttary boıynsha mamandar daıarlanady. Bul týraly Ortalyq kommýnıkatsııalar qyzmetinde ótken brıfıngide QR Qorǵanys mınıstriniń tsıfrlandyrý jónindegi orynbasary Darhan Ahmedıev málim etti.
Onyń aıtýynsha, joba zamanaýı áskerı qyzmetshiniń kelbetin qalyptastyrýǵa jáne áskerı qyzmet kezinde de, ony aıaqtaǵannan keıin de qajet bolatyn praktıkalyq daǵdylardy damytýǵa baǵyttalǵan.
— Joba aıasynda baılanys jáne telekommýnıkatsııa, radıobaılanys, ushqyshsyz avıatsııalyq júıeler, tsıfrlyq tehnologııalar jáne jasandy ıntellekt elementteri boıynsha mamandar daıarlaýǵa arnalǵan mamandandyrylǵan synyptar qurylyp jatyr, — dedi Darhan Ahmedıev.
Spıkerdiń sózinshe, qazirgi zamanǵy qarýly qaqtyǵystarda ushqyshsyz avıatsııalyq júıelerdiń, robottandyrylǵan keshenderdiń jáne zııatkerlik basqarý júıeleriniń mańyzy artyp keledi. Osyǵan baılanysty ushqyshsyz ushý apparattary baǵytyn damytýǵa erekshe nazar aýdarylyp otyr.
Sondaı-aq áskerı qyzmetshiler úshin tehnıkalyq zerthanalar men tsıfrlyq daıyndyq synyptaryn qamtıtyn zamanaýı bilim berý ınfraqurylymy qalyptastyrylyp jatyr
Darhan Ahmedıevtiń aıtýynsha, áskerı qyzmetshiler Tech Orda baǵdarlamasy aıasynda jasandy ıntellekt, derekterdi qorǵaý jáne aqparattyq qaýipsizdik baǵyttary boıynsha bilim alyp, halyqaralyq sertıfıkattarǵa ıe bola alady
— Oqý nátıjesinde halyqaralyq sertıfıkattar beriledi. Bul áskerı qyzmetshilerdiń kásibı biliktiligin arttyrýǵa jáne qyzmetin aıaqtaǵannan keıin eńbek naryǵyndaǵy múmkindikterin keńeıtýge yqpal etedi, — dedi ol.
Aıta keteıik, buǵan deıin Qorǵanys mınıstrligi áskerı qyzmetin aıaqtaǵan azamattardyń arnaıy testileý arqyly UBT tapsyrmaı-aq joǵary oqý oryndaryna túse alatynyn habarlaǵan edi.
