Qarýly kúshterde Sarbaz+ jobasy iske qosyldy
ASTANA. KAZINFORM — Almaty oblysyndaǵy Áýe qorǵanysy kúshteriniń 78460 áskerı bólimine Sarbaz+ pılottyq jobasy sheńberinde merzimdi áskerı qyzmet ótkeretin alǵashqy áskerge shaqyrylǵandar legi keldi.
Joba jaýyngerlik jáne arnaıy daıarlyqtyń jańartylǵan tujyrymdamasyn iske asyrýdy kózdeıdi. Qorǵanys mınıstrliginiń bul bastamasy merzimdi qyzmet kezinde IT, telekommýnıkatsııa jáne ushqyshsyz basqarylatyn qurylǵylardy basqarý sııaqty suranysqa ıe salalarda azamattyq mamandyqtar alýǵa múmkindik beredi.
Bastama áskerı qyzmetti kásiptik oqytýdy, tsıfrlyq sheshimderdi, medıtsınalyq monıtorıng júıesin jáne bos ýaqytty sapaly uıymdastyrýdy biriktirýdi kózdeıdi. Bul erekshelikter áleýmettik qoldaýdyń mańyzdy elementine aınalyp, ásker mektebinen ótken jas qazaqstandyqtardyń básekege qabilettiligin arttyrady.
Áýe qorǵanysy kúshteriniń 78460 áskerı bóliminde zamanaýı turmystyq jáne oqý júıesi engizildi. Osyndaı jańalyqtardyń biri fıtnes bilezikterin qoldaný arqyly áskerı qyzmetshilerdi medıtsınalyq baqylaý boldy.
— Bizde sarbazdarǵa zamanaýı oqý bazasynan jaqsartylǵan ınfraqurylymǵa deıingi barlyq qajetti jaǵdaı jasalǵan. Bul bizdiń jastardyń jeke jáne kásibı áleýetine salynǵan ınvestıtsııalar, — dep túsindirdi 78460 bólim komandıriniń orynbasary podpolkovnık Baqytjan Seıtov.
Áskerden keıin sarbazdar armııadan azamattyq ómirde paıdaly bolatyn bilim men daǵdy alyp shyǵady. Bul baǵdarlama biliktiligin arttyratyn merzimdi qyzmet sarbazdaryn, ofıtserler men serjanttar quramyn qamtıdy.
Bıyl qazan aıynda Sarbaz+ pılottyq jobasy aıasynda áskerı bólimde jeke qurammen tárbıe jumysyna jaýapty ofıtserler men serjanttar úshin qarqyndy kýrstar ótti.
Qorǵanys mınıstrliginiń jobasy áskerı qyzmetshilerdi jan-jaqty damytýǵa jáne áleýmettik beıimdeýge baǵyttalǵan ınnovatsııalyq daıyndyq modeline kóshýdi bildiredi. Eger ol sátti iske asyrylsa, merzimdi qyzmettiń bul modeli el Qarýly kúshteriniń barlyq bólimshesinde kezeń-kezeńimen engiziledi.
Aıta ketelik áskerılerdiń psıhologııalyq jaı-kúıin endi JI baqylaıtyny týraly jazǵan edik.