Qarýly kúshterde Muqaǵalı Maqataevtyń óleńderin oqýdan poezııalyq chellendj bastaldy

ASTANA. KAZINFORM — 9 aqpan kúni aqıyq aqyn Muqaǵalı Maqataevtyń týǵanyna 95 jyl tolady. Osyǵan oraı Qazaqstan Qarýly kúshterinde aqyn óleńderin oqýdan chellendj bastaý aldy, dep habarlaıdy Qorǵanys mınıstrliginiń baspasóz qyzmeti.

Mınıstrlik málim etkendeı, atalǵan poezııalyq chellendjdiń basty maqsaty — Muqaǵalı Maqataevtyń baı ádebı murasyn áskerı ortada keńinen nasıhattaý, áskerı qyzmetshiler arasynda ulttyq ádebıetke degen qurmetti nyǵaıtý. Sondaı-aq, patrıottyq taqyryptaǵy óleńder arqyly Otanǵa adal qyzmet etýdiń bıik rýhyn dáripteý kózdelgen.

— 4-9 aqpan aralyǵyna josparlanǵan poezııalyq chellendjge Qazaqstan Qarýly kúshteriniń barlyq áskerı qyzmetshileri men sarbazdary qatysa alady. Qatysýshylar aqyn óleńderin oqyp, beınejazba formatynda jarııalap, estafetany kelesi áskerı bólimge joldaıdy. Poezııalyq chellendj áskerı ujymdar arasyndaǵy shyǵarmashylyq baılanysty nyǵaıtyp, jeke quramnyń birligin arttyrýǵa oń yqpal etedi. Mundaı rýhanı is-sharalar áskerı qyzmetshilerdiń boıynda azamattyq ustanymdy qalyptastyryp, ulttyq rýhty kóterýge septigin tıgizedi, — dep atap ótti vedomstvo.

Atalǵan aktsııany Muqaǵalı Maqataevtyń «Otan» óleńimen bastaǵan Qorǵanys mınıstrligi Medıa-kontent ortalyǵy Atyraý garnızony baspasóz qyzmetiniń bastyǵy leıtenant Nurjanat Muhamet estafetany Áskerı-teńiz kúshterine joldady.

Muqaǵalı Maqataevtyń shyǵarmalary otansúıgishtik pen adamgershiliktiń, erlik pen eldik rýhtyń aıqyn kórinisi ekenin aıta ketý kerek. Aqyn poezııasy búgingi kúni de ózektiligin joǵaltpaı, jas urpaqty týǵan jerdi qadirleýge, elge adal qyzmet etýge úndeıdi.

Bul bastama Qarýly kúshterde rýhanı-mádenı qundylyqtardy damytýǵa, jas áskerı qyzmetshilerdiń ádebıetke qyzyǵýshylyǵyn arttyrýǵa baǵyttalǵan.

Osydan buryn Almatyda aqyn Muqaǵalı Maqataev pen sazger Tursynǵazy Rahımovty eske alý keshi ótkenin jazǵanbyz.