Qarýly kúshterde quqyqbuzýshylyqtar týraly ótinish berýdiń tsıfrlyq júıesi engizildi
ASTANA. KAZINFORM — Qorǵanys mınıstrligi Bas áskerı prokýratýranyń úılestirýimen «Tsıfrlyq profılaktıka» vedomstvoaralyq baǵdarlamasy aıasynda áskerı qyzmetshilerge arnalǵan ótinishterdi qabyldaýdyń tsıfrlyq júıesin iske qosty.
Vedomstvo málimetinshe, jańa servıs áskerı qyzmetshilerdiń quqyqtyq qorǵalý deńgeıin arttyrýǵa, quqyq buzýshylyqtardyń aldyn alýǵa jáne áskerı ujymdarda «Zań jáne tártip» qaǵıdatyn nyǵaıtýǵa baǵyttalǵan.
Tsıfrlyq júıeniń kómegimen áskerı qyzmetshiler kúsh qoldaný, zańsyz aqsha jınaý, psıhologııalyq qysym kórsetý jáne ózge de quqyqqa qaıshy áreketter týraly jedel túrde habarlaı alady.
Kelip túsken ótinishterge qatysty ýaqtyly áreket etý maqsatynda Qazaqstan Respýblıkasy Qarýly kúshteri Áskerı polıtsııasy bas basqarmasynda biryńǵaı «Jedel jeli» Call-ortalyǵy jumys isteıdi.
Árbir kelip túsken habarlama belgilengen tártippen qaralyp, tıisti sharalar qabyldanady.
— Profılaktıkanyń tsıfrlyq quraldaryn engizý áskerı tártipti nyǵaıtýǵa, quqyq buzýshylyqtardyń aldyn alýǵa jáne áskerı qyzmetti qaýipsiz ótkerýge jaǵdaı jasaıdy, — dedi QR QK Áskerı polıtsııasy bas basqarmasynyń profılaktıka basqarmasynyń bastyǵy podpolkovnık Ádilhan Qalıev.
Sondaı-aq ol áskerı qyzmetshiler zań buzýshylyq faktilerine beıjaı qaramaýy jáne quqyqqa qaıshy áreketter týraly ýákiletti organdarǵa der kezinde habarlaýy tıis ekenin atap ótti.
Ótinishterge jedel áreket etý quqyq buzýshylyqtardyń aldyn alýǵa, olardyń bastapqy kezeńde jolyn kesýge jáne áskerı ujymdarda zańdylyq pen quqyqtyq tártiptiń múltiksiz saqtalýyn qamtamasyz etýge múmkindik beredi. Ótinishter kelesi nómir boıynsha qabyldanady: +7 700 081 11 19.
Budan buryn Májilis kýlýarynda QR Qorǵanys mınıstriniń tárbıe jáne ıdeologııalyq jumystar jónindegi orynbasary Asqar Mustabekov áıelderdi áskerge alý týraly suraqqa jaýap berdi.
