Qarýly kúshterde drondarǵa qarsy qorǵanys tásilderi jetildirip jatyr
ASTANA. KAZINFORM — Qarýly kúshterde radıoelektrondyq qorǵanys jáne ushqyshsyz ushý apparattaryna qarsy is-qımyl máseleleri boıynsha oqý-ádistemelik jıyn ótip jatyr.
Mańyzdy sharaǵa Qazaqstan Respýblıkasy Qarýly kúshteriniń áskerı qyzmetshileri qatysyp jatyr.
Búgingi tańda jaýyngerlik tapsyrmalardyń sátti oryndalýy tek qarý-jaraqqa ǵana emes, sonymen birge radıoefırdi baqylaý deńgeıine de tikeleı baılanysty. Osy rette mamandar ózderiniń baılanys júıelerin bóten kedergilerden qorǵaýdy, radıosıgnal kózderin anyqtaýdy jáne drondarǵa tıimdi soqqy berýdi úırenip jatyr.
43988 áskerı bólimi komandıriniń orynbasary — shtab bastyǵy podpolkovnık Azamat Asqardyń aıtýynsha, ushqyshsyz tehnologııalardyń qaryshtap damýy radıoelektrondyq kúres mamandaryn daıarlaý isin de úzdiksiz jetildirip otyrýdy talap etedi.
— Qazirgi ýaqytta urys tek jerde nemese áýede ǵana emes, sondaı-aq radıoefırde de júrip jatyr. Sondyqtan radıoelektrondyq kúres mamandaryn daıyndaý — jaýyngerlik ázirliktiń basty baǵyttarynyń biri bolyp tabylady. Bul jıynda biz zamanaýı radıoelektrondyq kúres quraldaryn zerttep qana qoımaı, Qarýly kúshterdiń túrleri men ásker tekteri ókilderiniń ózara birlesip jumys isteýine basa nazar aýdaryp otyrmyz. Bizdiń basty maqsatymyz — baılanys júıelerin qorǵaý, ushqyshsyz avıatsııalyq júıelerdi anyqtaý jáne olarǵa qarsy turýdyń ortaq tásilderin ázirleý, — dedi ol.
Sabaq barysynda áskerı qyzmetshiler zamanaýı radıoelektrondyq kúres quraldaryn meńgerip, baılanys pen basqarý arnalaryn qorǵaý ádisterin úırenýde. Sondaı-aq ushqyshsyz ushý apparattaryn taýyp, olardyń sıgnalyn basyp tastaý amaldaryn pysyqtaýda.
Bul rette is-tájirıbege de erekshe mán berilgen. Jıynǵa qatysýshylar áskerı nysandardyń qaýipsizdik deńgeıin baǵalaýdy, zamanaýı REK keshenderin qoldanýdy jáne oqý-jaýyngerlik tapsyrmalardy oryndaý kezinde bólimsheler arasyndaǵy ózara is-qımyldy úılestirýdi pysyqtap jatyr.
51809 áskerı bóliminiń áskerı qyzmetshisi kapıtan Erik Qasymbekov te bul jıynnyń mańyzy zor ekenin atap ótti.
— Mundaı jıyndar jańa bilim alyp qana qoımaı, Qarýly kúshterdiń túrlerindegi áriptesterimizben tájirıbe almasýǵa múmkindik beredi. Ásirese, shynaıy urys dalasyna barynsha jaqyndatylǵan jaǵdaıda is-qımyldardy pysyqtaıtyn praktıkalyq bólimniń paıdasy zor. Munda shyńdalǵan daǵdylar áskerı nysandardy qorǵaý jáne zamanaýı qaterlerge laıyqty soqqy berý tapsyrmalaryn sapaly oryndaýǵa septigin tıgizedi, — dedi kapıtan E. Qasymbekov.
Baǵdarlamanyń taǵy bir mańyzdy bóligi, ol ózara tájirıbe almasý. Qarýly kúshter túrleri men ásker tekteriniń ókilderi ushqyshsyz tehnologııalardyń damýyna baılanysty týyndaıtyn qazirgi zamanǵy qaýip-qaterlerdi talqylap, olardyń jolyn kesýdiń birlesken tásilderin jetildirý ústinde.
Osyndaı jıyndardy ótkizý mamandardyń biliktiligin arttyrýǵa, bólimsheler arasyndaǵy baılanysty nyǵaıtýǵa jáne jańa syn-qaterler jaǵdaıynda áskerı nysandardy qorǵaýdyń eń ozyq ádisterin engizýge jol ashady.
Aıta ketelik Qurlyq áskeri áskerı ınstıtýtynda dron tehnologııasyn meńgergen mamandar daıarlanyp jatyr.
