Qarýly kúshterde «Aıqas» atty tazy qyzmet etedi
ASTANA. KAZINFORM — Aqmola oblysyndaǵy 44813 áskerı bóliminde áskerı qyzmetshilermen birge Aıqas esimdi kóne tazy tuqymynan shyqqan ıt oqý-jaýyngerlik mindetterdi atqaryp júr, dep habarlaıdy Qorǵanys mınıstrliginiń baspasóz qyzmeti.
Aıqasty bólimge komandırdiń jaýyngerlik daıyndyq jónindegi orynbasary maıor Nurlybek Jamanǵarın 2020 jyly Qyzylorda oblysy Aral qalasynan alyp kelgen.
— Tazy ıti kóshpelilerdiń úılesimdi ómirin beıneleıtin «jeti qazynanyń» qataryna jatady. Aıqas menimen birge besinshi jyl qyzmet etip keledi. Biz úshin mańyzdy jetistik — Aqmola oblysynda ótken «Altyn qazyna» respýblıkalyq tazy jarysynda jeńiske jetýimiz jáne Aqtóbe oblysyndaǵy «Salbýryn» dalalyq synaǵynda júldeli oryn alýymyz, — dedi maıor N. Jamanǵarın.
Bes jyl ishinde Aıqas bólimsheniń kúndelikti ómirine tolyqtaı beıimdeldi. Onyń kún tártibi naǵyz sarbazdikindeı. Tańerteń turý, as ishý jáne oqý-jattyǵýlar ol úshin qalypty jaǵdaı.
Áskerı tártipke úırengen tórt aıaqty «jaýynger» saptyq jıyndarǵa da qatysady. Ol platsqa birinshi bolyp kelip, komandırdiń buıryǵymen tý tuǵyrynyń janynda otyrady. Saltanatty rásimderde Aıqas el rámizderine qurmet bildirip, Memlekettik ánurannyń áýenine ózinshe ún qosady.
Qyzmet barysynda Aıqas tazy tuqymynyń eń jaqsy qasıetterin aıqyn kórsetti. Ol shapshań, tózimdi jáne tez úırengish. Sarbazdarmen birge áýe keńistigin qorǵaý mindetin atqaratyn áskerı bólim aýmaǵyn patrýldeýge shyǵady. Qyraǵylyǵy men sezimtal estý qabileti oǵan kúzet mindetterin tıimdi oryndaýǵa múmkindik beredi.
Budan buryn Abaı garnızonynda boıy 2 metr sarbaz boryshyn ótep júrgenin jazǵanbyz.