Qarýly kúshterde 7 myńǵa jýyq áıel áskerı qyzmet atqarady
ASTANA. KAZINFORM — Qazirgi tańda Qazaqstan armııasynyń qatarynda 7 myńǵa jýyq áıel qyzmet etedi. Olardyń myńǵa jýyǵy – ofıtserler, al 6 myńnan astamy – kelisimshart boıynsha áskerı qyzmetshiler. Sonymen qatar 11 áıel basshylyq laýazymdardy atqarady.
Búginde áıelder Qazaqstan Respýblıkasy Qarýly kúshteriniń ajyramas bóligine aınalyp, eldiń qorǵanys qabiletin nyǵaıtýǵa eleýli úles qosyp keledi. Olar er azamattarmen qatar áskerı qyzmettiń túrli baǵyttarynda kásibı mindetterin abyroımen atqaryp júr. Qazirgi tańda Qazaqstan armııasynyń qatarynda 7 myńǵa jýyq áıel qyzmet etedi. Olardyń myńǵa jýyǵy – ofıtserler, al 6 myńnan astamy – kelisimshart boıynsha áskerı qyzmetshiler. Sonymen qatar 11 áıel basshylyq laýazymdardy atqarady.
Áıel áskerı qyzmetshiler Qarýly kúshterdiń barlyq túrleri men ásker tekterinde qyzmet etedi. Olar áskerı medıtsına, psıhologııa, qarjy, zań, baılanys, kadr jumysy, materıaldyq-tehnıkalyq qamtamasyz etý, is júrgizý jáne aqparattyq tehnologııalar salalarynda jaýapty mindetterdi atqaryp keledi. Bul olardyń tek kómekshi qyzmetterde ǵana emes, áskerı basqarý júıesiniń mańyzdy býyndarynda da tabysty eńbek etip júrgenin kórsetedi.
Sońǵy jyldary áıelderdiń áskerı qyzmettegi múmkindikteri edáýir keńeıdi. Búginde olar jaýyngerlik qamtamasyz etý bólimshelerinde de qyzmet atqaryp, shtab ofıtseri, nusqaýshy, ushqysh, mergen jáne arnaıy maqsattaǵy bólimshelerdiń áskerı qyzmetshisi sııaqty kúrdeli áskerı mamandyqtardy meńgerýde. Sonymen qatar áıelder erlermen birge parashıýtpen sekirip, ushqyshsyz ushý apparattaryn qurastyryp, basqarady jáne Qarýly kúshterdiń jaýyngerlik ázirligin qamtamasyz etý jónindegi mańyzdy mindetterdi oryndaıdy.
Áskerı mansapty tańdaǵan qyz-kelinshekter úshin kásibı bilim alýǵa da barlyq jaǵdaı jasalǵan. 2002 jyly Qurlyq áskerleriniń áskerı ınstıtýtynda alǵash ret «Baılanys» mamandyǵy boıynsha áıel áskerı mamandar daıarlanyp shyqty. Sol túlekterdiń kópshiligi búgingi kúni de áskerı qyzmetin jalǵastyryp, joǵary ofıtserlik shenderge, onyń ishinde polkovnık áskerı ataǵyna deıin kóterildi.
Áıelderdi áskerı mamandyqtarǵa daıarlaý jumysy búgin de júıeli túrde jalǵasyp keledi. 2023 jyldan bastap eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýty áskerı-medıtsınalyq fakýltetke qyzdardy qabyldaı bastady. Oqýdy aıaqtaǵan túlekterge «leıtenant» alǵashqy ofıtserlik ataǵy berilip, olar Qazaqstan Qarýly kúshteri qatarynda áskerı qyzmetin jalǵastyrady.
Aıta ketý kerek, qoldanystaǵy zańnamada áıelderdi merzimdi áskerı qyzmetke mindetti túrde shaqyrý kózdelmegen jáne qazirgi ýaqytta mundaı normany engizý máselesi qarastyrylyp jatqan joq.
Qarýly kúshtermen kelisimshart jasasýǵa nıet bildirgen azamattar áskerı qyzmetke qabyldaný tártibi, úmitkerlerge qoıylatyn talaptar jáne qyzmet ótkerý sharttary týraly tolyq aqparat alý úshin turǵylyqty jeri boıynsha jergilikti áskerı basqarý organdaryna nemese áskerı bólimge júgine alady.
Aıta ketelik Qarýly kúshter tarıhynda tuńǵysh ret kıberqaýipsizdik ofıtserleri túlep ushqan edi.
