Qarýly kúshterde 31 qańtarda merzimdi áskerı qyzmetshilerdiń týystaryna «Ashyq esik» kúni ótedi
ASTANA. KAZINFORM – 31 qańtarda Qarýly kúshterdiń barlyq ásker bóliminde merzimdi qyzmettegi áskerı qyzmetshilerdiń týystary men jaqyndary úshin «Ashyq esik» kúni ótkiziledi. Іs-shara aıasynda ata-analar uldarynyń qyzmet jaǵdaıyn kózben kórip, áskerı qyzmetshilerdiń kúndelikti qyzmetimen jaqynyraq tanysa alady. Bul týraly Qorǵanys mınıstrliginiń baspasóz qyzmeti habarlady.
«Ashyq esik» kúni baǵdarlamasyna qarý-jaraq pen áskerı tehnıka úlgilerin kórsetý, merzimdi qyzmettegi áskerı qyzmetshilerdiń kórsetilimdik jattyǵýlary, olardyń turmystyq jaǵdaılaryn, kazarmalar men ashanalardy kórsetý kiredi.
Ásker bólimder men bólimshe komandırleri merzimdi áskerı qyzmetke qatysty kez kelgen suraqqa jaýap beredi. «Ashyq esik» kúnin ótkizýdiń maqsaty armııa men qoǵam arasyndaǵy senimdi nyǵaıtýǵa, ashyqtyqty arttyrýǵa jáne merzimdi áskerı qyzmettiń naqty jaǵdaıyn tanystyrýǵa baǵyttalǵan.
Іs-shara qorytyndysy boıynsha eń úzdik merzimdi áskerı qyzmetshilerge adal qyzmeti men úlgili áskerı tártibi úshin marapat retinde bir kúndik seıildeme beriledi.
Ár áskerı bólim «Ashyq esik» kúnin ótkizý ýaqytyn ózi belgileıdi. Al ata-analarǵa aqparatty áskerı bólimderdiń qolbasshylyǵy jetkizedi.
Qarýly kúshterdiń áskerı bólimderinde ata-analar men shaqyrylýǵa deıingi jastar úshin «Ashyq esik» kúnderin turaqty túrde ótkizip turý tájirıbege aınalǵan. Ol áskerı qyzmettiń ashyqtyǵyn qamtamasyz etýge jáne ata-analardy habardar etýge baǵyttalǵan. Osy maqsatta bólim komandırleri WhatsApp messendjerinde arnaıy chattar ashady. Sondaı-aq «Otbasymen beıne qońyraý» servısi arqyly ata-analarmen turaqty beıneqońyraý baılanysy uıymdastyrylǵan. Sol úshin arnaıy planshetter satyp alynǵan.
Sonymen qatar áskerı bólimderde «Analardyń júregi» sarbaz analary komıteti respýblıkalyq qoǵamdyq birlestiginiń ókilderine turaqty túrde tolyq qoljetimdilik berilgen. Olar áskerı bólimderdegi sarbazdardyń qyzmet etý jaǵdaıyn únemi tekserip, ol jerdegi jaǵdaı týraly Qarýly kúshterdiń basshylyǵy men ata-analarǵa aqparat berip turady.
Buǵan deıin Qarýly kúshter bólimsheleriniń úılestirý jattyǵýlaryna 7 myńǵa jýyq áskerı qyzmetshi qatysqanyn jazǵan edik.