Qarýly kúshter jańa oqý tsıkline kóshti: búgin — Jaýyngerlik daıarlyq mamany kúni
ASTANA. KAZINFORM — Qarýly kúshterdiń Jaýyngerlik daıarlyq jónindegi ortalyq organynyń tarıhy 1992 jylǵy 14 tamyzdan bastalady. Osy kúni Qorǵanys mınıstrliginiń qurylymynda tıisti bólimshe qurylyp, Qorǵanys mınıstriniń jaýyngerlik daıarlyq jónindegi orynbasary — basqarma bastyǵy laýazymy engizildi. Ol týraly vedomstvonyń baspasóz qyzmeti málim etti.
Jaýyngerlik daıarlyq departamentiniń quzyretine áskerı oqytý protsesin uıymdastyrý, áskerı qyzmetshilerdiń qajetti daıarlyq deńgeıine qol jetkizý jáne ony jetildirý kiredi. Bul jumystyń mańyzdy quramdas bóligi — bólimsheler men áskerı basqarý organdarynyń óz mindetterin tabysty oryndaýy úshin qajetti úılesimdiligin qamtamasyz etý.
Qazirgi jaǵdaıda qarýly kúrestiń sıpaty men ony júrgizý tásilderiniń ózgerýin eskere otyryp, departament jaýyngerlik daıarlyqty uıymdastyrý tásilderin jańartýǵa jáne onyń tıimdiligin arttyrýǵa baǵyttalǵan keshendi is-sharalardy júzege asyryp keledi.
— Bıyl Qarýly kúshter jazǵy oqý kezeńinen bir jyldyq oqý tsıkline kóshti. Jańa tártip Qarýly kúshterdiń barlyq túrlerinde, ásker túrleri men tekterinde, áskerı bólimder men mekemelerde engizildi, — delingen habarlamada.
Jeke daıarlyq barysynda alǵashqy kezeńde áskerı qyzmetshi bazalyq jalpyáskerı daıarlyqtan, odan keıin áskerı-eseptik mamandyǵy boıynsha daıarlyqtan ótedi. Kelesi kezeń — bólimshelerdi úılestirý. Ol bólimshe men vzvodtan bastap rota men batalonǵa deıingi deńgeılerdi qamtıdy.
Jańa tártipke sáıkes jas jaýyngerler jalpyáskerı daıarlyq kýrsynan ótkennen keıin jaýyngerlik daıarlyq aptalyǵy bastalady. Mundaı tásil olardyń bazalyq bilim men daǵdylardy meńgerý deńgeıin baǵalaýǵa múmkindik beredi.
— Jańa oqý tsıkline kóshý aıasynda jaýyngerlik daıarlyq baǵdarlamasynyń mazmuny da qaıta qaraldy. Jalpyáskerı pánder boıynsha jańa normatıvter men biryńǵaı atys daıarlyǵy kýrsy ázirlendi, komandırlik daıarlyqtyń formaty jańartyldy. Sonymen qatar jaýyngerlik daıarlyq is-sharalaryn elektrondyq formatta josparlaýǵa jáne esepke alýǵa múmkindik beretin «Bes qarý» baǵdarlamalyq modýli engizilip jatyr, — dep habarlady mınıstrlikten.
Bıyl dene daıarlyǵy basqarmasy Jaýyngerlik daıarlyq departamentiniń qaramaǵyna berildi. Bul áskerı qyzmetshilerdiń dene jáne jaýyngerlik daıarlyǵyn biryńǵaı oqý protsesine biriktirýge múmkindik berdi.
Jaýyngerlik daıarlyqty damytýdyń mańyzdy baǵyttarynyń biri — polıgon ınfraqurylymy men jattyǵý bazasyn jetildirý. Zamanaýı tehnıkalyq quraldar túrli taktıkalyq stsenarıılerdi qurýǵa jáne áskerı qyzmetshilerdiń is-qımyldaryn naqty urys jaǵdaıyna barynsha jaqyn ortada pysyqtaýǵa múmkindik beredi.
Jaýyngerlik daıarlyq júıesin uıymdastyrý men damytý baǵytynda komandırler men tıisti organdardyń mamandary kúndelikti jumys atqarady. Olar daıarlyqty josparlap úılestiredi, sabaqtardyń mazmunyn jetildirip, oqytýdyń zamanaýı ádisterin engizedi jáne áskerı qyzmetshilerdiń daıarlyq deńgeıin baqylaıdy.
Áskerı qyzmetshilerdiń senimdi áreket etip, qoıylǵan mindetterdi oryndaýǵa ázirligi kóp jaǵdaıda tıisti mamandardyń kásibıligine, tájirıbesi men jaýapkershiligine baılanysty. Olar jaýyngerlik daıyndyqty qamtamasyz etip, memlekettiń qorǵanys qabiletin nyǵaıtýǵa úlken úles qosyp keledi.
Aıta keteıik, jaqynda Qazaqstan Qarýly kúshterinde jańa kásibı mereke alǵash ret atalyp ótti.
